VEVHURIN RAGA

　　　　　　　　　　　　　　　　　　　　　　　Tavaluna 8

1)Be dura nu vahuhu atamani i vavine, sa mwata nu vahuhu nituna atamani i
　vavine. Kera geki ran lagi ram bav ira nitura. Ram ivusi mai nitun houn
talai i matmaita. Ta naturi vavine kea gaiviha, naturi atamani hen ivusi.
(1) Ira lagi gairua raru bav nitura mwalanggelo ramuru gita vavine vwate
nu ros atatu. Ramuru lai nitu boe sa bwana, ramuru lai nitura mwalanggelo
men tai man simango. I kea mwa dai simango gin boe sa bwana(2) mwa en gi
vuron vavine. Niu mwa hav vora te niu mwasigi ta ihana be binihi marahi,
be naturigi vi vora ta bwativun non ginau boe sa bwana kea. Vavine ros
atatu havan mwalanggelo.(3) Nu hanggo nituna.

2)Naturigi atamani, ira gitanggoro ram uloi wangga be U U. Be naturi vavine,
gitanggoro ram bev gin silo gaivua be imwa duluai rav rongoe be tasalana
ata Ute taragaiana.(5) Ira hei ram iloe be vavine. Ram lai bari, naturigi
nu hunia(6) lalai bilan vwavwa gonggonai, bwatuna be binihi marahi.
Mwahavana vavine mwa hanggo atatu, aloan tamana abena atamani. Hogisin
tamana vi lai damu vi wehi toa vi valinia vi vugea vi laia gi gan vavine,
gabe nituna nu vora ta vavine, vwavwa bilan vavine hanggo atatu nituna
atamani. Atatu duluai ram iloe be naturi vavine kea aloan tamana nu van
nggoroe huba, raru vi lagi vai nongoiha.(7) Tuhuba vavine hanggo atatu vi
eno gubweng hangvulu vi garuhi bibilin voroana. Naturi vavine mwa
daulatoga tauluna 10 sa hanvul doma, ratahin daulato vi hingge bilan
vwavwa vi vugeri(8) bwanana, gabe nu lai mahalei nggoro daulato.(9) Take
mwalanggelo i daulato ramuru hav lagi te radu. Be daulato nu ilo bwana non
ratahina take vi matagu vi lalagi(10) radu.

3)Taman mwalanggelo i ratahina raru vi gita boe gaitolu sa gailima, muan boe
livona nu en lol iluna sa bobibia, bwanmemea gailima sa hangvulu. Nitura
men lagi. Kunia mulei tabwalugu(11) vi lihilihi.(12) Vi lai bwanmemea
lalai bilan vwavwa sa havana vwate vavine lavoa i non lavoa non vavine vi
lol non lihilihi. Kea vi lihi ginau hangvulu doma sa 20. Be nitun ratahigi,
(13) liu 50. Tamana vwate vi lai boe, boe livo kea vi wehia vi lol
ginaganiana. Be tabwalugu nitun ratahigi vi wehi boe mabu sa livoala.(14)
Bongi ira vavine rav lol singisingi rav tigo vi rani. Ira bilan vwavwa rav
lai tabwalugu be vi gagaru an tahi. Rav hamai nin tahi i gem wehi boe ba
hae lol gamali(15) i gem lihi ginau duluai matbongon gamali. Keki huri
nitun ratahigi ngano.

4)Nitun atatu hivhivo ram lol lalanggovanana ngan la imwan tamana vi lihi �@
sori �A bari sa bari gairua �B uli �C lalau �D bunbune sa bunbune gairua
sa gaitolu �E livon boe vi tagarae sa livo gairua be nu wehi boe gaiviha
vi tagara livo hangge kunia. Nitun ratahigi vi tagara livo hangvulu. Livo
keki vi tagarae batena ira tamana rav loli sa ira havana rav lol bolololi.
(16) Be nitun atatu ngan nu hiruga gin bwanmemea i boe take bilan
uteloloara dum i ginau duluai keki nu vahal nituna, bwatuna nu hav lol te
didini rovoga lol talu sa nu hav lai te bilan dura.

5)Hangge tamana mwa hora non nituna. Nora mahalei bwanmemea, toa nu wehia
gabe tabwalugu nu vora. Tamana nu habwe boe livo huba i boe gaiviha mulei
gi volin vavine. Tamana vi ngis gubwen gaiono sa gaivwelu,(17) hohov
lalanggova huri ginaganiana i kea nu hahara nituna huba lol gubwengi
duluai huri halan ginau duluai. Keki gaha vi hora nituna vai aben
tamaragai vwate be vi haharae gin mataisao. Kunia ngan mulei tabwalugu,
tamana nu haharae sa tamaragai vavine sa tamaragai atamani. Lagia ran wehi
boe gi bigin vwavwaligi nu wehi dura ran valinia la imwa. Dura vwaligi kea
ihana umu.

6)Hangge ira taman vavine, ninovi ran lalanggonggo, be kera gaivasi rav
hanggo volin nitura bului tamana. Kera gaivasi ram mai mai bwanmemea
gaivasi gi buluin non tamana nu nggol nituna ginia. Ira bilan vwavwa ran
lai tabwalugu ram hiv an tahi sa hala behe mwa hav iloe te be vaigougo vi
lagi, ta rav la vava rai votu kea vi gita batoia ta si hav hudaligi tehe.
Amua tamaragai nu haharae ta nu vev dau huri ute vai nongoiha. Mwarani
taman mwalanggelo mai ratahina raru lai bwanmemea gaituvwa bari ivusi. Ta
hogosin mwalanggelo, be hogosina sibona sa hogosina nitun tamana vwate,
kea vi lai bwanmemea vi hanggoe, i hogosina vwate vi lai barimemea vi
hanggoe. Bwanmemea gairua gainggolen vavin lagi vwate. Mwalanggelo vi
hunia gi bwanan ihei gaituvwa nin ira havan tamana,(18) ta taman mwalanggelo
mai ratahina i tuan ira ratahin mwalanggelo ran tomare ran hanggo bwana
ivusi nggolenggole gaibwalbwalo huri tabwalugu,teltele huri mwalanggelo.(19)

7)Hangge ira atatun mwalanggelo ram botui vanuan tabwalugu. Ira ratahin
mwalanggelo mai ira hogosina ram ban ram du matbongon imwa.Taman tabwalugu
vi haroro la imwana aben tabwalugu vi uloinia be mwei namen lingigo garigi
gom lagi nin imwadaru. Hangge huin tabwalugu mwa ruru mwa dei.(20) Ira
hogosin atamani lagi ram lai bari gaituvwa ram detel tabwalugu ginia, i
vwavwa bilan tabwalugu vwate vi tagahi dagai barin tabwalugu gabe nu to
maia. Vwavwa kea mwa nggahalai ramun bari gara la gaon tabwalugu. Gaon
tabwalugu mwasin gao wasi be unu sa gaovunga.Hangge hogosin mwalanggelo vi
hagai bwanmemea gabe nu hanggoe. Vwavwa bilan vavine vi vugeri bwana kea
vwavwa i tabwalugu ramuru du aten bwana ram mai vai lol sara.

　　　　　　　　　　　　　　　　　　　Tavaluna 9

1)Hangge taman vavine vi lai taiva vi hagainia be ramen uvia.Taman tabwalugu
vi lai boe, nituna vi wehia vi ware ihana be mitalai sa mwisale sa mitari
hano be ihan bilan vwavwa sa ihan tamana, �@ Mitalaihuhu, kunia ihan
tamana Molhuhu, �A Mwisaleliliu, tamana Moliliu, �B Mitaribani, tamana
Molbani, sa vi ware ihan havana vwate nu mate huba tuai gabe vavine. Be
si motari kea nitun ratahigi Motariala, tamana Viraala.(21) Tamana mwa avo
mwa hahara nituna mwa do aben boe mate i tangbunia gabe ira tamana gailima
ran hogon bwana ninovi alolona. Gairuan tangbunia non ratahin tabwalugu
kea nu taua mwa hen to dagai mau. Hangge nogonan avoana taman tabwalugu be
nom vavine i masan tasalamwa nom tanga mwa eno. Ta tanga gea damu gaituvwa
nu en aluna, hogosin mwalanggelo vi lai damu vi gasia.

2)Ratahin mwalanggelo nu lai bwana, mwalanggelo vi hunia la bwatuna vi uloi
ihan havan tamana vwate vi veve be bwanamwa tata. Ira ratahin mwalanggelo
ram bugeri bari vataha bilan vwavwa.(22) Vwavwa ram gaisigo gin ariu bwaro
ram huri atamani gabe mwalanggelo nu hun bwanana. Ram bano, taman
mwalanggelo vi hanggo bwana vi tomuai mwalanggelo, vwavwa ram huri
mwalanggelo. Rav dalis tabwalugu mai tamana, tanga, damu, boe mate, rav la
dalisia varua rav harav bugin taman tabwalugu.(23) Hogosin mwalanggelo vi
lai damu vi gasi aluna. Ratahin mwalanggelo vwate vi ros tangbunia.
Ratahin vavine, ira tuana ram ros non tangbunia, kea non vuvugeri alolona.
Lolovono lalai ira tuan tabwalugu, gabe daulato dodolua ram lalagi
mwalanggelo lagi maira tuana dodolua.

3)Hangge kekhadogaha tatan atatu gailima ram samara la hala. Vwavwa bilan
mwalanggelo ram samara mai nora teltele be rav wehi ira ratahin
mwalanggelo maira hogosina, sa rav garuhira gin wai sa bili sa taniavu.
Ira ratahin tabwalugu gabe ira tasalan tamana dodolua ban dagai ram doron
be rav bulbul tagainira rav veve be kekea, be ramen gan bwangon tabwalugu
sa rav hanggo huhuna. Ta vwavwa bilan tabwalugu ram dul dagai ira ratahina
i tabwalugu mabutu alun bilan ira vwavwa. Ira ratahina ram gele avoana non
tabwalugu nu togo gi vavin togo(24) radu nu av leilei ira tasalan tamana
mai get marahi sa rovoga hahavwani sa vwangavwangan boe. Ratahin tabwalugu
ram bugeri bwanmemea lalai vwavwa bilan mwalanggelo huri teltele.(25) Ira
taman tabwalugu ram lai gaiviviligi huhugave i dame, ihei nona 50 sa 100
mwa du la hala be vi wehi hei nin ira hogosin vavine lagia. Ratahin
mwalanggelo vi vugeri bwana hangge vi ravae na atatu gabe taman tabwalugu
(26) hangge rav siv langgao. Ira mwalanggelo rituai havan lagi ram bosa rau
(27) mwa dabahu vava rav votu.

4)Hangge ira vavine ram samara liu ran votu la vanua. Mwalanggelo vi tai non
gai, tamana vwate vi vahoe lol sara, gai gailima gain boe, gain
lingilingiana varana vwate. Rav uv taiva huri livon muan boe(28) gi matan
boe gabe tabwalugu nu wehia. La varan boe gaivasi bilan atatu gaivasi ran
hogon bwana ninovi bului taman tabwalugu, i raun longgo gailima sa gaiviha
gabe bwanmemea. Atatu lagi mwa doroi tuan mwalanggelo gin bwatun boe mate
gabe tasalana nu wehia, vi toroi(29) tuana ban dagai nin mwasin tuan
sibona.

5)Hangge mwalanggelo vi tu vi tau limana alun gai muan boe aluna, tamana
vwate sa non ratahigi gabe mwasin havana(30) vi avo aluna vi haharae gin
halan ginau rituai, sobe mwalanggelo bwatigoruga vi hulu vagahia lol matan
sinobu be kea voso sa bugurana sa vonosleoana sa nu hav rong te tamana mai
ratahina. Avoana vi nogo taman tabwalugu gailima mai ratahina ram alo boe
mai dura, lingilingiana, raun longgo. Rav aloe varua,rav harav bugin atatu
lagi. Taman tabwalugu vi vataha kera gaivasi gin boe, vi vataha vwavwa
bilan tabwalugu gin bwana raun longgo. Ira ratahin vavine,muana mwa bugeri
bwana gaituvwa sa gairua i bari gailima sa hangvulu, vi taua la bwatun
tabwalugu, vi uloi ahoan tabwalugu be bwanamwa tata malomwa gailima sa
hangvulu. Ira ratahina rituai rav vugeri nora kunia rav tata duluai la
mwlanggelo vi ling ira tasalan bwaligana gin boe i dura.(31)

6)Hangge vavine vi van la imwan ahoana. Hogosin ahoana vi vora rau niu bwaro,
vi vohainia tabwalugu vi to alolona, ta ratahin tabwalugu vi lai bari huri
rau niu kea. Ratahin tabwalugu vi vugeri bwanan ira tuan mwalanggelo mai
ira hogosina, kera ngan gabe ram bului mwalanggelo gin bilara ginaganiana
sa malogu sa bwana seresere memea. Longgo vi manogo, mwalanggelo vi hun
bwanan atatun tamana vwate raru vi van la imwa vi voro longgo. Ratahin
tabwalugu vwate vi varahi vatun umu ta kea gabe nituna mwa dogo vi siv
lagi vai nongoiha. Ta varahi vatu mwa du huri nitun vira mai motari be
motari nu vugeri seresere gailima i bari memea vudolua, vira nu hogon
seresere hangvulu. Kea hanggea motari vi hingge motari vwate vi varahi
vatu, binihiva be motari vi lol kunia batena nituna vi lagi vai nongoiha,
kea vi lol kunia. Sinobu ram bisalsala nin ira bwaligan mwalanggelo
gailima i tasalara gailima ram maturu vai rani. Gabi vi oda vi wehi gara
toa gailima rav vugea. Ira lagi rav taura la hala rav avo duleinira.