LAEF STORI BLONG VIRADORO:
　　　　　　　WAN LONG OL LAS HAE JIF BLONG VANUATU


　　　　 　　　　 　　Written by Russel Nari & Masanori Yoshioka(1)

　　　　　　　　　　　　　　　　　　Kindai Vol. 88(Dept. of Intercultural Studies, Kobe University)



FES TOKTOK

　　Insaed long buk ia, bambae yumi lukluk long laef stori blong papa, bubu, angkel, brata, fren, jif, mo wan gret lida Silas Ngarileo Bule we Vanuatu i save long hem.(2) Truaot long buk ia bambae yumi usum kastom nem blong hem, Viradoro. From we long yumi evriwan we i save long hem o luk hem araon long ol defren ples blong yumi long Vanuatu mo gat ol defren tingting o lukluk long hem, buk ia bambae i traem blong givim yumi tru pikja blong man ia, Viradoro.

　　　　　　　　　　　　　　　　

　　Olsem pat blong laef stori blong hem, bambae buk ia tu hemi kavremap samfala bigfala toktok, tingting, wok mo bilif blong Viradoro. Wetem ol toktok, tingting, wok mo bilif blong hem ia, bambae i save helpem yumi blong luksave from wanem hemi wan gret lida. Buk ia bambae hemi kavremap taem bifo mo afta long independens long 1980. Long evri tingting, toktok mo aksen blong hem long ol defren taem long laef blong hem kam kasem long tede, hemi faet strong blong kipim uniti, pis mo joe long evri level blong sosaeti blong yumi.
　　Buk ia tu bambae i kavremap ol lukluk blong hem we hemi bin luk mo hemi stil stanap strong blong Vanuatu i mas folem mo kam olsem eksampol long ol narafala kaontri long Melanesia, Pasifik mo Wol. Bambae yumi lukluk tu long rol blong hem long ol defren wei we hemi bin traem blong developem mo protektem ol defren isu long ol defren taem.
　　Wetem buk ia yumi evriwan i hop blong gat tru pikja blong huia nao Viradoro mo samfala tingting, toktok, bilif mo drim blong hem blong i save rimaendem yumi mo keadem yumi long ol fiuja desisen mo lukluk blong yumi wan wan, famle, komuniti o kaontri blong muvum yumi fowod long laef.

�T　LAEF STORI BLONG VIRADORO

1 Bakgraon

　　Jif Viradoro hemi kamaot long vilij blong Labultamata long Not Pentikos. Hemi gat samwe long 78 yia mo hemi gat 14 pikinini, seven boe mo seven gel.Wan long ol pikinini blong hem hem i Russel Nari, wan long tufala man we i raetem buk ia. Viradoro hemi bin mared long tri defren woman. Fes woman blong hem nem blong hem hemi Kare, seken woman blong hem nem blong hem hemi Diana Mudali mo namba tri woman blong hem nem blong hem hemi Selina. Kam kasem long disfala yia 2001, Viradoro hemi gat 55 bubu mo tri gran bubu.
　　Viradoro folem samfala infomesen mo samfala kes wok se hemi bin bon long yia 1922. Yia ia i no klia from we long taem ia i no bin gat gudfala sistem blong kipim wan stret rekod long ol hospitol o jos blong talemaot stret det we hemi bin bon long hem. Hemi bin bon long vilij blong Abwatuntora. Papa mo mama blong hem, nem blong tufala, Gilbert Tarimule mo Ros Mugoro. Hemi bin gat wan narafala brata we nem blong hem hemi Philip Ilo we plante man mo woman oli save long hem speseli long aelan blong Pentikos. Hemi bin wan long ol fes ni-Vanuatu medikol dokta long taem blong tufala gavman blong Inglis mo Franis. Dokta Philip Ilo nao hemi bin klinimap aelan blong Pentikos mo brekem samfala strongfala fasin we i bin mekem se Pentikos i bin kamap plante long saed blong helt. Viradoro wetem Dokta Philip Ilo, tufala i bin gat wan sista we nem blong hem hemi Vane.
　　Mama blong olgeta hemi bin ded taem Viradoro hemi smol nomo mo sista blong mama blong hem we nem blong hem hemi Anika Butu wetem man blong hem we hemi wan long ol papa blong olgeta we nem blong hem hemi Nathaniel Bule, tufala i bin karemaot mo lukaotem hem gogo hemi kam bigfala man. Wetem papa mo mama blong hem Bule mo Anika, hemi bin gat trifala narafala brata we nem blong olgeta hemi, George Ngari, Luke Bulekolo, Richard Leona mo sista blong olgeta nem blong hem hemi Rachel Mulango.

2 Viradoro wetem Papa blong hem Bule

　　Viradoro hemi bin muv raon long trifala distrik blong Alau, Ahivo mo Aute. Hemi save gud long ol ples ia wetem ol pipol we oli bin stap long ol eria ia olsem we i stap long Map1.

　　　　　　　　　　　　　　

Afta long sam yia long Abwatuntora long Alau distrik, Viradoro wetem papa mo mama blong hem Nathaniel Bule mo Anika Butu oli bin muv i go stap long Atabulu long wan ples we oli singaotem Lagaroitora long Ahivo distrik. Oli bin go stap wetem wan long ol hae jif blong Not Pentikos we nem blong hem hemi Jif Viratiro. Long ples mo taem ia Bule hemi bin wok had blong soem long Viratiro se hemi wantem kam wan lida. Bule hemi stat blong planem ol kokonas mo ol narafala samting olsem koton we hemi bin luk ol waetman oli stap planem blong mekem mane. From Ahivo wetem populesen blong hem we i stap gro bigwan, hemi bin had blong sam long ol tingting ia i kamaot gud from i no bin gat inaf spes blong karemaot ol wok ia long bigfala skel.
　　Long 1926 taem Viratiro hemi luk se Bule i rere blong karemaot ol responsibiliti blong lukaotem ol pipol, hemi sendemaot Bule wetem Viradoro blong go long Aute distrik. Viratiro hemi bin sendemaot Bule blong hemi wok hemi wan. Hemia i olsem praktikel blong Bule blong Viratiro hemi luk se hemi save kam wan lida mo karem responsibiliti blong lukaotem ol pipol o nogat.
　　Be bifo Viratiro i sendemaot Bule wetem Viradoro, Viratiro hemi bin askem Bule blong bildimap wan bigfala nakamal blong hem. Blong bildim nakamal ia, Bule hemi mas go bak long Loltong be antap long bus long wan ples we oli singaotem Lolbuanmarita blong katem ol bambu mo pulum long solwota i go bak long Atabulu/Lagaroitora. I bin tekem Bule sikis manis blong finisim nakamal. Taem we nakamal ia i finis, mo long taem ia nao Viratiro hemi bin rere blong lego Bule i go antap long Aute distrik.
　　Taem Viratiro hemi sekhan long Bule long wan ples we oli singaotem Lolsarasarangailima, hemi talem trifala toktok ia long hem se mi livim yu blong go long distrik blong Aute olsem laet blong saenem distrik ia, olsem wan tija blong tijim distrik ia, mo go olsem wan jif blong lukaotem distrik ia. Bule wetem Viradoro, tufala i bin livim Atabulu wetem ol narafala man mo woman. Olgeta we oli bin folem Bule long taem ia, i gat Bovari, Jack Bwasi, Daniel Wai, Basil Rovo mo Michael Sara mo tufala woman, Motaribebe mo Minimobwagi.
　　Bule wetem ol pipol we oli bin folem hem oli bin statem wan niufala vilij long wan ples we oli singaotem Lolvatu long Aute distrik. Oli bin stap long Lolvatu blong tufala yia be Bule hemi bin luk se bambae hemi had wok long ol taem we bambae i kam bihaen speseli blong karem ol prodakt blong olgeta i go daon long solwota. Afta sam tok tok wetem ol brata blong hem, oli disaed blong muv i go daon long pasis blong Loltong. Long 1928 oli muvaot long Lolvatu.
　　Long taem ia nao Bule hemi stat blong mekem ol bisnes olsem we hemi bin stap lukim ol waetman oli mekem long ol ples olsem Santo. Hemi stat blong karem ol man blong wok blong hem long Jenuware 1929. Hemi statem wetem olgeta blong Namaram. Ol fes pipol we oli bin wok blong hem blong katem bus long Loltong hemi Tawal, Bolif, Sileva, Sakavi mo Bwandoro. Oli bin wok blong hem long siks manis mo hemi pem olgeta wetem ol pig. From taem ia nao wok blong Bule i stat blong kam antap olsem wan bisnesman.

3 Viradoro long Wol Wo II

　　Viradoro hemi no bin skul. Long 1930 taem Bisop Dickson blong Angglikan jos hemi bin statem ol skul, wan long Atabulu long Ahivo distrik, Anarasi long Alau distrik mo Abwatunbanga long Aute distrik, oli bin selektem hem blong go long Vureas hae skul be papa blong hem Bule hemi bin stopem hem. Bule hemi bin talem long hem se bambae ol brata mo sista blong hem nomo oli skul be hem bambae i stap nomo long aelan blong lukaotem ol smolsmol samting we tufala i bin stap mekem mo blong taem olgeta we oli skul oli kam bak, bambae oli save res long hem. Trening mo skul blong hem hemi blong karem basket blong papa blong hem mo folem hem long ol defren samting olsem ol miting, kaekae, mared, ded blong ol man o pig-kiling seremoni. Long wei mo fasin ia nao Viradoro hemi bin karem ol trening blong hem.
　　Afta we Papa blong hem i bin stopem hem blong go long skul, Viradoro hemi bin stap wetem hem nomo blong mekem wanem samting we papa blong hem i bin wantem hem blong mekem. Kam kasem long 1942 taem ol Amerikan oli bin kam long Niu Hebrides blong bildimap wan bes blong olgeta long aelan blong Santo long taem blong Wol Wo II, mo oli bin kam raon long ol aelan blong Vanuatu blong karem ol man blong helpem olgeta, Viradoro hemi wan long olgeta pipol ia we oli bin kamaot long aelan blong Pentikos.
　　Hemi interes blong luk se long taem ia lidasip rol blong Viradoro i bin stat blong soaot finis. Wetem smol edukesen mo nogat save blong toktok long Inglis, hemi no bin stopem hem blong stand aot olsem wan lida. Aot long 360 pipol we oli bin karem olgeta long taem ia, ol Amerikan oli bin apoentem Viradoro blong lukaotem ol pipol ia. Hemi bin stap olsem wan medel man bitwin ol long Amerikan wetem ol lokol grup we hemi bin lidim. Truaot long fo manis we oli bin stap wetem ol Amerikan long taem blong wo, hemi bin liv mo karem fulap respek long ol Amerikan mo ol lokol pipol we hemi bin lidim.
　　Afta we oli bin stap wetem ol Amerikan long fo manis long Santo, Viradoro i bin mekem sua se evriman we oli bin go daon aninit long lidasip blong hem oli kam bak sef long aelan blong olgeta. Taem Viradoro hemi bin kam bak afta long fo manis wetem ol Amerikan, papa blong hem Bule hemi bin stat blong givim hem sam responsibiliti mo preperem hem blong kam wan lida. Wan long ol las mo strong test we papa blong hem i bin givim olsem trening blong hem, hemi blong sendemaot hem long Loltong i go long Labultamata.

4 Vilij blong Labultamata hemi bon

　　Olsem pat blong trening blong kam olsem wan lida long fasin blong kastom blong Pentikos, i gat wan taem long rod ia we papa o wan jif blong yu i mas givim long yu blong luk se yu fit blong lidim ol pipol nao o no yet. Long 15 Mei 1952, taem blong Viradoro i bin kamtru, mo papa blong hem Bule hemi sedemaot hem long Loltong blong go long Labultamata. Long taem ia hemi statem wan niufala japta long laef blong Viradoro.
　　Taem Viradoro hemi bin kamtru long Labultamata, i bin gat fiu pipol nomo oli bin stap long ples ia. I bin gat John Bovu wetem woman blong hem, Des Musiro, tufala i bin stap long Lolkerebua, Tevi Kule hemi bin stap long narafala ples we oli singaotem Ataveu, Munggao we hemi mama blong Wilkere, David Sine, Bolenga, Higo mo Robin Wagana oli bin stap long pasis we oli singaotem Alageta (lukim Map 2). Afta long sam taem i pas sam long ol pipol ia oli bin muvaot i go long defren ples long Pentikos. Long pentikos bifo ol pipol oli bin stap liv long ol smol smol vilij we plante taem hemi long ol graon we oli bilif tru long histori se hemi blong olgeta o laen blong olgeta.

　　　　　

　　Viradoro mo seken woman blong hem, Diana Mudali, taem tufala i kamtru long Labultamata, tufala i bin go silip wetem John Bovu mo Des Musiro long Lolkerebua. Des Musiro hemi nefiu blong papa blong Viradoro, Gilbert Tarimule. Viradoro hemi bin bildim fes haos blong hem long Ataveu. Hemi liv long ples ia kam kasem long tede. Afta we haos ia i finis, hemi bin kilim wan buluk mo mekem wan bigfala kaekae from haos blong hem mo askem long ol man mo woman long ol narafala eria blong kam tugeta long kaekae ia. Long taem ia hemi bin givim ol mat long olgeta we oli bin kam blong danis long taem ia.
　　Afta we Viradoro hemi stat blong setol daon, hemi stat blong mekem fulap samting olsem planem ol kokonas mo ol narafala samting blong winim mane mo helpem ol pipol. Long tri yia blong hem long Labultamata, hemi stat blong luk se hemi no gud blong ol pipol i stap long ol smolsmol vilij olsem from plante rison. Be i gat tufala bigfala rison we hemi mekem se hemi disaed blong bildimap ples ia o vilij ia Labultamata, wan se bambae hemi had blong mekem ol bigfala divelopmen sipos ol pipol i stap long ol smolsmol vilij blong olgeta, mo tu se bambae hemi mekem i moa had blong tufala gavman blong provaedem ol seves sipos ol pipol oli liv wan wan olsem we i bin stap hapen long taem ia.
　　Wan long ol bigfala problem we i bin stap hapen long taem ia, hemi plante long ol jif mo pipol we oli bin faenem i had blong ol pipol oli muv tugeta from we i no gat plante man we oli bin prepea blong alawem kokonas o ol narafala samting blong olgeta blong ol pipol i save katem blong bildim ol haos. Viradoro hemi bin luksave isu ia be hemi bin ting mo hemi stil ting se pipol oli mas kam fastaem bifo long ol narafala samting olsem graon mo mane. Long lukluk ia mo tingting ia, i mekem se long 1956, hemi alawem ol pipol blong katem daon ol kokonas mo bildim haos blong statem ples ia Labultamata. Hemi bin talem se taem oli katemaot ol kokonas bambae pipol oli kam jenis blong kokonas ia.
　　Hemi interes tu blong luk se taem tingting blong statem wan niufala ples i bin kam antap, Viradoro wetem ol narafala lida long taem ia oli bin gat wan vison blong ples ia. Hemia i soem tru long nem ia Labultamata. Plante long ol ples raon long Pentikos o Vanuatu oli bin karem nem blong olgeta tru long ol man blong jos o nem blong ol tri, ston, reva o ol narafala samting olsem, be nem ia Labultamata hemi spesel. Labultamata hemi kamaot long tufala bigfala toktok long lanwis blong Not Raga, Labul hemi minim se 'kam tugeta' mo tamata we hemi 'pis', so Labultamata hemi minim se 'yumi kam tugeta blong i gat pis'.
　　Wan yia afta long ol pipol oli muv tugeta mo Labultamata hemi bon, wok i stat long wan long ol fesfala bigfala jos haos long distrik blong Aute long 1957 mo 1958. Long namba 30 long Manis Oktoba long yia 1959, bigfala joshaos ia hemi bin open. joshaos ia hemi bin helpem evriman mo woman long distrik blong Aute long ol big bigfala dei olsem krismas, niu yia, mared, ol pikinini oli karem wota o baptaesem, blesing blong ol lida blong jos mo ol narafala spesel dei.
　　Long ol yia i stap go kasem long fesfala yia blong 1970, Viradoro wetem komuniti blong Labultamata oli bin joenem han mo jenisim fulap samting we hemi inkludem wan dok blong kago mo kopra, niufala skul, wota saplae sistem mo wan bigfala nakamal. I gat wan samting nomo we hemi bin mekem se ol divelopmen ia i bin posibol, wan lida wetem vison mo ful koperesen blong ol narafala lida mo pipol blong olgeta.
　　Semak olsem joshaos ia, Labultamata komuniti hemi bin bildimap wan long ol fesfala bigfala nakamal long distrik blong Aute. Nakamal ia we i bin helpem fulap pipol long ol defren wei mo long ol defren taem, gud taem mo nogud taem olsem long taem blong ol hariken.
　　Aot long fulap gudfala memori blong nakamal ia, i gat tufala samting we hemi klia i stap olsem risal blong hem: wan hemi bin brekemdaon tingting blong bildim ol smolsmol nakamal long fulap defren ples o plante smolsmol nakamal long wan eria o vilij, mo seken samting, hemi bin plei wan impoten rol long rod blong kasem independens blong Vanuatu. Long 1977, ol desisen blong namba seven konggres blong Vanuaaku Pati i bin kamaot aninit long nakamal ia. Nakamal ia we fulap man oli save long hem olsem Gamal Vuhungana long lanwis blong Not Raga we hemi minim olsem top blong wan hae maonten. Hemi las wan long saes, tingting mo toktok.

5 Viradoro insaed long bisnes

　　Viradoro hemi bin go insaed long bisnes long yia 1942. Ol bisnes blong Viradoro hemi folem nomo ol lukluk, tingting mo wok we Papa blong hem Bule hemi bin stap mekem long ol yia i stap kam. Bigfala lukluk mo tingting bihaen long ol bisnes ia hemi blong helpem ol famle blong hem mo ol pipol blong Pentikos.
　　Ol mane we Viradoro hemi bin statem ol tingting mo wok blong ol bisnes blong hem tru long smol salari we hemi bin kasem taem we hemi bin stap wok olsem wan medel man blong solvem problem blong tufala man. Antap long hemia, hemi bin katem kopra tu long ol waetman long ol plantesen long Santo. Mane we Viradoro hemi bin kasem long tufala rod ia hemi bin helpem hem blong statem ol bisnes blong hem.

5-1 Bisnes blong stoa

　　Bisnes blong stoa hemi bin stat smol finis taem we Viradoro hemi bin stap long vilij blong Loltong wetem papa blong hem. Long 1952, taem Viradoro hemi bin muvaot mo go long Labultamata, stoa ia tu hemi bin muv hemi go wetem hem. Long taem ia tu, Viradoro hemi bin stat blong mekem bisnes blong stoa hemi kam antap. Hemi bin wok wetem wan waet bisnesman we fulap long ol olfala oli save gud long hem we nem blong hem hemi Oska Niuman. Oska Niuman hemi blong Ostrelia.
　　Taem tufala i bin wok be from Viradoro hemi no save long rid o raet hemi mekem se folem ol rekod blong Oska Niuman, Viradoro hemi bin gat wan kaon long hem we i kasem samples long 600-00 paon.
　　Folem rekod blong Oska Niuman, Viradoro hemi bin agri blong pem bak mane ia. Oska Niuman hemi bin givim Viradoro trifala wei blong hemi pemaot kaon ia. Wan, hemi blong Viradoro hemi lukaotem wan sip blong hem, tu blong Viradoro hemi lukaaotem wan long ol stoa blong hem, mo tri blong Viradoro hemi katem kopra mo salem long hem. Folem fes tingting blong Oska, Viradoro hemi bin luk se sipos hemi lukaotem sip be sipos i gat strong win we bambae hemi mekem se sip i no save wok mo namba tu hemi save putum laef blong ol man we bambae oli wok long hem long denja. Long namba tu tingting blong stoa, bakegen Viradoro hemi bin ting se hemia bambae hemi tekem long taem mo bambae hemi had long from hemi no save long rid mo raet. Viradoro hemi bin agri long tingting blong katem kopra mo salem long hem.
　　Afta we tufala i bin saenem agrimen wetem Oska, Viradoro hemi bin statem kontrak blong hem. Hem bin karem 15 man long fes trip blong hem i go katem kopra long Lamap long Malekula. Fes grup ia oli bin wok fo dei nomo mo Viradoro hemi kilim wan buluk blong oli kaekae mo hemi bin pem olgeta long pasis blong Melsisi.
　　Long fasin ia, taem Viradoro hemi bin mekem ol nekis trip blong hem i bin gat fulap pipol we oli bin rere blong go long kontrak blong hem. Viradoro hemi bin pem ol wokman blong hem long 12-00 paon long tu bag blong grin kopra mo pem kaekae blong olgeta tu. Long taem ia Oska wetem Ballande tufala i bin pem ol wokman blong olgeta long 8-00 paon long tu bag blong grin kopra. Long taem ia Viradoro hemi bin stat blong winim fulap man blong wok aninit long kontrak blong hem. I no long taem tumas mo Viradoro hemi pem finisim kaon blong hem. Long taem ia Oska hemi bin gat bigfala tras mo konfidens long wok blong Viradoro.
　　Long 1957 Jif Clement Molture wetem ol pipol blong Labultamata oli bin askem Viradoro blong hemi helpem olgeta wetem wan joshaos. Viradoro tru long gudfala rilesensip blong hem wetem Oska Niuman, tufala i bin saenem wan narafala kontrak from joshaos ia. Viradoro hemi bin karem samples long 57 pipol blong oli wok aninit long kontrak ia long plantesen long Malekula. Viradoro hemi bin karem ol pipol stat long Avatuna hemi go kasem long Loltong. Olgeta we oli bin go long kontrak ia hemi ol jif wetem ol pipol blong olgeta. Olgeta 57 pipol ia oli bin wok long sikis manis, tri wik mo tri dei blong komplitim kontrak ia. joshaos ia hemi bin finis long yia 1958 mo hemi bin open long 1959. joshaos ia hemi bin helpem ol pipol blong Aute Distrik.
　　Afta we joshaos ia hemi bin finis, Viradoro hemi bin bildim wan bigfala stoa blong hem long vilij blong Abwatuntora. Nem blong stoa ia hemi Bwativuroi. Long taem ia oli bin save long hem long bisnes, gavman mo jos olsem fesfala blak bisnesman long Niu Hebrides mo long Melanesia speseli long Niu Hebrides mo long Solomon Aelan.

5-2 Bildim rod

　　Long 1966 tufala gavman i bin sendem wanfala buldos blong katem wan eapot long Not blong Pentikos. Long taem ia bisnes blong stoa blong Viradoro hemi bin wok gud mo long sem taem ia hemi bin stap insaed long Pentikos Lokol Gavman Kaonsel. Afta we buldos ia hemi bin komplitim eapot ia, Viradoro hemi bin askem Adimani we hemi bos blong kampani ia blong katem rod i gotru long Aute distrik. Lukluk mo tingting bihaen blong katem rod ia hemi blong helpem olgeta pipol blong Aute distrik blong karem ol prodius blong olgeta i go daon long solwota blong oli save salem o karem kago long solwota hemi go antap long bus. Wan narafala risen blong katem rod ia hemi blong karem ol sikman long bus blong oli go daon long haos blong meresin o long eapot. Be taem we Viradoro hemi bin askem long kaonsel from tingting ia, olgeta insaed long kaonsel mo ol jif oli no bin agri long tingting ia from hemi no bin folem plan mo loa blong wok blong gavman.
　　Afta we kaonsel wetem ol jif oli no bin agri long tingting ia, Viradoro hemi no bin givap from hemi bin ting se hemi anis we buldos hemi stap finis long Pentikos mo sipos oli mestem janis ia bambae hemi had blong kasem wan narafala anis olsem. From risen ia, Viradoro hemi bin stanap strong from tingting ia insaed long kaonsel mo long gavman. Taem toktok blong rod mo buldos hemi bin kam strong tumas i bin mekem se tufala gavman i bin karem Viradoro hemi go long Santo blong eksplenem ol risen blong hem long olgeta. Afta we Viradoro hemi bin eksplenem ol risen blong hem, tufala gavman i bin agri long ol tingting ia mo alawem buldos ia blong hemi save katem rod ia.
　　Viradoro olsem asesa blong distrik blong Aute hemi bin givim wan mane blong hem nomo we i bin kasem 750-00 paon long bihaf blong ol jif mo ol pipol blong Aute blong buldos ia i save katem rod ia. Rod ia we long wan blong hem i kasem samples long 16 kilometa we hemi stat long Atangurua long Ahivo distrik hemi gotru long Aute i go kasem long Loltong. Tede ol pipol blong Pentikos oli usum rod ia yet wetem sam ripea wok we Pablik Woks Dipatmen hemi bin mekem stret afta long independens.

5-3 Bisnes blong trakta

　　Long 1968, Viradoro hemi bin karem fes trakta long aelan blong Pentikos afta we rod ia hemi bin finis. Viradoro hemi bin karem trakta ia blong helpem ol pipol blong Not Pentikos wetem ol defren divelopmen we oli bin wantem mekem long eria blong olgeta. Trakta hemi bin helpem ol pipol blong karem ol prodius blong olgeta long bus i go daon long solwota mo kago long solwota hemi go antap long bus. Hemi bin help tu blong karem ol sik pipol long ol defren eria long Not Pentikos blong go long haos blong meresin.
　　Antap moa long ol help ia, trakta ia hemi bin help blong bildim ol skul olsem Nazareth Skul mo ol defren joshaos long eria blong Not Pentikos. Olsem evri bisnes blong Viradoro, bisnes blong trakta ia hemi moa blong helpem ol pipol. Hemia i mekem se fulap taem praes blong trakta blong mekem ol wok ia hemi smol nomo mo samtaem hemi mekem ol wok blong fri nomo.

5-4 Bisnes blong bot

　　Long 1968, Viradoro hemi bin karem wan smol bot. Bot ia hemi blong sevesem ol pipol blong Labultamata mo ol narafala eria we rod i no pas long olgeta blong karem ol sikman i go long haos blong medesin. Bot ia hemi smol nomo from hemi isi blong karem from pasis blong Labultamata hemi gat tumas rif mo ston. Bisnes blong bot ia hemi bin helpem fulap pipol long ol defren taem.

5-5 From wanem nao ol bisnes ia oli no wok kasem long tede?

　　Blong ansarem kwestin ia, fulap man, woman, pikinini bambae oli gat ol defren tingting blong olgeta. Long fasin ia, bambae hemi mekem se bambae i gat fulap risen from wanem ol bisnes ia oli no gohed kasem long tede. Be ating i gat tufala bigfala risen we Viradoro hemi givim blong ansarem kwestin ia. Wan, Viradoro olsem wan asesa, wan jif, wan komuniti lida mo wan bisnesman hemi bin traem blong lukaotem interes mo nid blong ol defren pipol ia blong mekem sua se i gat pis, joe mo uniti oltaem insaed long wanwan famle, komuniti mo eria we hemi bin responsibol long hem. Folem risen ia, i bin mekem se ol bisnes blong Viradoro oli bin en blong mekem bigfala mane be rili en blong olgeta hemi blong helpem ol pipol blong mekem sua se i gat tras mo konfidens long ol defren bodi we hemi bin ripresentem olsem gavman, jif, jos, komuniti lida, mo olsem wan bisnesman. Fasin ia hemi bin mekem se i bin gat fulap kaon blong ol man Pentikos mo sam bigfala man raon long Vanuatu we i stap kasem long tede.
　　Namba tu risen, hemi from long taem ia i no bin gat fulap man we oli bin save gud blong lukaotem ol bisnes ia. Hemia i bin mekem se hemi had long Viradoro from hem tu hemi no bin save long rid mo raet mo antap long hemia hemi bin gat fulap wok from hemi bin ripresentem fulap defren paoa. Hemia i bin mekem se hemi no bin gat taem blong stap kwaet mo lukluk long bisnes nomo.
　　Folem tufala risen ia, hemi klia se Viradoro hemi bin pruvum tru long ol bisnes blong hem se sipos yu we yu wantem mekem fulap mane long bisnes, yu mas givim fulap taem blong yu long bisnes nomo. Hemi bin pruvum tu se blong kam wan lida blong ol pipol hemi wan had wok mo ol man oli no mas miksimap wetem bisnes. Antap long hemia, tru long ol bisnes blong Viradoro hemi soem tu se blong kam wan gudfala lida blong ol pipol yu mas holem gudfala bakap blong bisnes blong mekem sua se i gat tras mo konfidens oltaem long lidasip blong yu. Tufala samting ia, lidasip mo bisnes i mas wok tugeta blong i gat wan strong mo stebol sosaeti long Vanuatu.

6 Asesa

　　Folem ol wok mo lidasip blong Viradoro we hemi bin stap mekem long taem we hemi stap wetem papa blong hem mo afta we hemi muvaot mo i go statem vilij blong Labultamata, Bule wetem ol narafala jif oli bin ting se Viradoro hemi rere blong tekem ova long papa blong hem Bule. Long 1963 Viradoro hemi kam wan asesa. Hemi tekem ova long papa blong hem. Bule hemi bin wan long ol faef asesa we tufala gavman wetem ol narafala jif oli bin jusum olgeta blong lukaot long aelan blong Pentikos. Jif Wol hemi bin lukaot long Saot, Jif Basil Lio long Melsisi, Jif Samson long Bwatnapni, Jif Bule long Aute, mo Jif Albert Hinge long Alau mo Ahivo. Bule hemi statem wok blong asesa long 1930.
　　Viradoro hemi bin tekem ova long Bule afta we gavman mo bisop oli bin ting se Bule nomo bambae hemi jusum jenis blong hem. Taem oli putum tru long vot, 180 pipol oli bin vot blong Viradoro hemi tekem ova long papa blong hem. Be sileksen blong Viradoro hemi folem nomo sem fasin we ol olfala jif oli bin usum long bifo i kam kasem taem we Viratiro hemi sendemaot Bule long Ahivo blong go long Aute distrik mo Bule i sendemaot Viradoro. Viradoro hemi bin lukaot long eria we i stat long Nabwarangiut i go kasem Alememea (lukim map 1).
　　Taem Viradoro hemi tekem ova long Bule, long sem taem hemi tekem ova tu olsem lida insaed long famle blong hem mo tekem ova tu olsem wan jif long laen blong hem. Evri paoa ia papa blong hem Bule hemi bin givim long hem. Ol narafala jif oli bin agri long hem from oli bin luksave tru long ol wok blong hem se Viradoro hemi fit blong karem ol responsibiliti ia. Long 1963, oli givim hem ful paoa blong wok long ples blong papa blong hem. Papa blong Viradoro, Bule, hemi bin ded long namba 12 Julae long 1965. Long taem ia kam kasem long tede, Viradoro hemi bin givimap laef, wok, tingting mo toktok blong hem from ol pipol blong Pentikos mo Vanuatu.
　　Afta long yia 1963, Viradoro hemi bin holem ol narafala posisen insaed long Jos Kaonsel mo Skul Kaonsel long Not Pentikos. Olsem memba blong Lokol Kaonsel tru long apoenmen blong hem olsem wan asesa, hemi bin traem blong mekem sua se gavman, jos mo skul, mo wok blong ol kastom jif oli go tugeta long evri agrimen we hemi bin pat long hem. Hemi luk trifala samting ia, gavman, jos mo kastom olsem wan nomo mo jif nao hemi responsibol blong lukaotem olgeta mo mekem sua se oli wok tugeta blong helpem ol pipol long aelan blong Pentikos mo Vanuatu.
　　Long 1972, Viradoro hemi go insaed long politik. Long 1976 long wan miting blong Aelan Gavman long Bwatnapni long sentrol Pentikos, 158 jif wetem Viradoro oli bin mekem wan agrimen blong ol asesa ia oli risaen. Afta long taem ia, oli bin jusum Viradoro blong hemi kam wan long ol sab-komiti blong Pati. Nomata we hemi no save raet, hemi bin stap olsem kapten blong sip blong luk se sip ia i ron long gudfala rod oltaem.

7 Viradoro insaed long politik

　　Long 1970, Viradoro hemi bin mekem wan tua blong Pasifik. Tua ia hem wan nomo hemi bin pem wetem smol mane blong hem. Hemi bin mekem tua ia hem wan nomo nomata we hemi no save long toktok Inglis o Franis. Bigfala tingting bihaen long tua ia, hemi blong lukluk long sam samting we i save helpem hem wetem wok blong hem. Hemi bin wantem faenemaot tu se i gat sam narafala samting we oli stap mekem long ol narafala kaontri we yumi long Vanuatu yumi nogat. Hemi bin spendem tu dei long Fiji, siks wik long Niu Zilan, wan wik long Ostrelia mo wan wik long Niu Kaledonia. Afta long tua ia, Viradoro hemi bin mekem i klia se　i nogat eni samting we hemi niu. Evri samting mo tingting we ol defren kaontri ia oli gat mo mekem, yumi tu long Vanuatu yumi gat mo yumi save mekem.
　　Be taem we hemi bin stap long Niu Zilan, oli bin askem hem long tingting mo lukluk blong hem long independens. Hemi bin talemaot long olgeta se hemi ting se bambae hemi stret tumas blong Vanuatu i kasem independens blong hem long 20 yia taem. Long tingting mo lukluk blong Viradoro, Vanuatu bambae hemi rere blong kasem indepedens long yia 1990. Be taem Viradoro hemi stap long Numea long Niu Kaledonia, hemi bin faenem Vincent Bulekon mo Vincent hemi bin toktok lelebet wetem hem from tingting blong independens. Long taem ia toktok mo tingting blong independens i bin stap blong kam antap bigwan. Long Viradoro, Vanuatu hemi no bin rere yet blong kasem independens long taem ia, be from fulap save man we oli skul gud oli bin ting se taem hemi bin stret, i bin mekem se hemi bin joenem olgeta blong tokbaot rod blong independens. Be oltaem, Viradoro hemi bin stap blong defendem rol blong ol jif stat long Tores i go kasem saot long Aneityum blong mekem sua se kaontri blong Vanuatu hemi kamaot namba wan long Pasifik mo long wol.
　　Long 1972, Fata Walter Lini hemi bin askem Viradoro blong helpem olgeta long saed blong politik. Festaem Viradoro hemi bin faenem i bin had from we hemi wan long ol asesa. Nomata we hemi no save gud long ol loa we tufala gavman blong Inglis mo Franis i bin stap mekem, be hemi bin jaj wetem wisdom we hemi gat blong mekem sua se pis mo uniti hemi stap ol taem. Be afta long wan miting we i bin long Bwatnapni we i bin lukim ol asesa ia oli bin risaen long wok blong olgeta. Long taem ia nao, Viradoro hemi muv insaed long politik. Hemi bin stap insaed long politik blong representem voes blong olgeta jif mo ol pipol we i stat long not blong Vanuatu i go kasem long saot blong Vanuatu.
　　Stat long taem we Viradoro hemi bin insaed long politik, hemi bin toktok long evri bigfala miting mo konggres we Pipol Provesenel Gavman (P.P.G) mo aftaVanuaaku Pati hemi bin gat. Hemia sam long ol toktok blong hem we hemi bin stap mekem long ol defren miting bifo mo afta long independens (lukim Table).

Long ol toktok blong hem, hemi bin stap olsem papa, advaesa mo profesa blong rod ia. Hemi bin talem long olgeta lida long ol gud taem mo rabis taem we Vanuatu bambae hemi gotru long hem mo wanem rod hemi ting se hemi gud blong folem. Fulap taem ol lida oli no bin tekem ol toktok ia from olfala man hemi no save long ol niufala tingting we plante man we oli skul gud oli save. Mekem se long 1991 Viradoro hemi bin disaed blong stap kwaet. Long taem ia kam kasem long tede, i nomo gat pis mo uniti insaed long politik, jos, komuniti, mo famle long Vanuatu.

8 Viradoro insaed long kastom blong kilim pig

　　Viradoro hemi wan long ol jif we hemi defren long ol narafala jif we oli stap raon long Vanuatu. Hemi soem hemia long evri samting we hemi bin mekem tru long laef blong hem. Tede long Vanuatu, fulap man, woman o pikinini oli ting se blong kam wan jif yu mas kilim pig. Viradoro hemi soem se hemi no tru. Long Viradoro, evriman, woman o pikinini we hemi bon long Vanuatu hemi wan jif long on raet blong hem. Pig-kiling hemi wan long ol taem we wan lida hemi kamaot long nakamal mo nasara blong talemaot long evriwan se hemi bin mekem evri samting afta we hemi bin pruvum tru long ol wok blong hem. Pig-kiling hemi las samting.
　　Long Not Pentikos i gat fo stej insaed long Namanggi. Wan hemi Tari, namba tu hemi Moli, namba tri hemi Livusi o Udu o Ngarai, mo las wan hemi Vira. Taem man hemi kilim fes pig, hemi save go insaed long stej blong Tari mo hemi tekem nem afta Tari olsem Tariliu, Tarimweleia i go olsem. Taem hemi kilim pig blong go insaed long seken stej Moli, hemi tekem nem olsem Molsangvulu. Nao Viradoro hemi karem nem Tarimweleia taem hemi kilim fes pig long 1924. Viratiro nao hemi bin givim pig ia long hem blong hemi kilim. Tarimweleia hemi nem blong papa blong Viratiro taem we hemi go insaed long Tari . Papa blong Viratiro ia, hemi wan long ol bigfala jif we hemi bin stap long Abwatuntora. Jif ia, taem hemi bin kilim pig blong go insaed long las stej we hemi Vira, hemi bin karem nem ia Viradoro. Jif Silas Ngarileo hemi tekem nem blong bigfala jif ia nao.
　　Afta we Viradoro o Silas Ngarileo hemi bin kilim fes pig blong hem, hemi nomo bin gat eni moa pig-kiling long ol taem we Viradoro wetem papa blong hem Bule, tufala i bin muvaot long Ahivo i go antap long Aute. Afta long hemia, papa blong hem Bule hemi bin givim wan am ban long hem we long lanwis blong Not Pentikos oli singaotem bani. Bani ia, papa blong hem Bule hemi bin givim long hem haed nomo we ol man oli no save long hem. Hemia i bin mekem se taem Viradoro hemi bin wantem mekem pig-kiling bakegen long 1975, i bin gat sam raorao from fulap oli bin ting se Viradoro hemi giaman. Blong mekem se i no gat tumas toktok long bihaen, Viradoro hemi bin agri wetem tingting blong ol narafala jif we hemi mekem se hemi karem bani long ples ia. Hemi bin pem bani ia long ten pig long Vavora, brata blong woman blong hem, long nem blong Leah Rorona, mama blong woman blong hem.
　　Afta we Viradoro hemi tekem bani long seken taem, sista blong hem, Rachel Mulango hemi jes kam blong talem se hemi tru papa blong olgeta Bule hemi bin givim bani long hem finis. Be Viradoro wetem klia tingting mo lukluk blong hem long laef, hemi ting se hemi oraet nomo blong mekem sua se i no gat eni samting hemi go rong long taem we bambae hemi kam bihaen.
　　Taem we Viradoro hemi kilim narafala pig bakegen, hemi muvaot long stej blong Tari mo hemi go insaed long stej blong Moli. Nem blong hem long stej ia hemi Molsangvulu we hemi nem blong wan bigfala jif long laen blong hem we nem blong hem Molsanga we hemi bin liv long wan ples we oli singaotem Giute. Taem hemi bin muv i go long narafala stej bakegen, we hemi Livusi, hemi bin karem nem ia Livuslanglulu we hemi nem we Viratiro hemi bin givim long hem. Long taem ia tu hemi karem wan long ol tabu strap we oli singaotem, mahangamaita long lanwis blong Not Pentikos mo kilim ten pig.
　　Long 1976, hemi karem tu moa long ol tabu strap ia. Wan we oli singaotem tamanggamangga mo narawan we oli singaotem garovuroi long lanwis blong Not Pentikos mo hemi tekem nem ia Virawahai mo hemi kilim ten pig. Long 1977, Viradoro hemi pefomem wan long ol las pig-kiling seremoni blong hem. Long taem ia, hemi bin kilim ten pig we tut i fas mo hemi karem trifala nem ia, Marihaivira, Bwatigorona mo laswan nao hemi Viradoro. Hemi karem trifala nem ia long sem fasin olsem we narafala bigfala jif ia, Viradoro, we hemi bin stap long Abwatuntora, hemi bin karem long las pig-kiling seremoni blong hem. Viradoro we hemi bin stap long Abwatuntora hemi bin gat trifala nem ia, Tavolainvanua, Mahavgangani, mo Vuhunganvanua. Viradoro we hemi bin stap long Abwatuntora, hemi wan long ol las jif we Not Pentikos i bin save long hem. Hemi bin gat olgeta samting mo taem ol man oli nidim eni samting oli bin kam blong lukim hem long ples blong hem long Anviu, long Abwatuntora.
　　Viradoro ia nao, hemi bin givim paoa long pikinini blong hem Viratiro, mo Viratiro hemi bin givim long Bule, mo Bule hemi givim long Viradoro. Sipos yumi lukluk gud, i no bin gat eni ileksen long hu bambae i tekem ples blong hu be ae blong man nomo hemi bin lukim mo talem se hu bambae jenisim hu tru long rod we yumi lukim i kam kasem long naoia. Bambae hemi tru se samfala long yumi bambae i luk se lidasip ia hemi bin ron long famle nomo, be hemi no tru, bambae hemi dipen tumas long huia nao hemi wok had folem tingting mo toktok blong ol lida ia.
　　Stat long 1924 kasem long 1975, Viradoro hemi bin mekem pig-kiling bakegen. Bitwin long ol yia ia, Viradoro hemi bin wok had blong pruvum long evriwan se hemi wan lida. Hemi bin karem respek mo lidasip rol olsem fes bon blong papa blong hem Bule, long taem blong Wol Wo II, olsem wan asesa, olsem wan bisnesman, olsem wan lida insaed long ol toktok blong independens, mo olsem wan bigfala jif. Wan mesej we stori blong Viradoro hemi wantem talemaot long yumi se blong kam wan lida, hemi had wok mo hemi moa bigwan bitim kilim pig mo karem ol nem we long en blong hem hemi olsem flaoa nomo be i no gat frut blong hem. Tede, i gat fulap man we oli ting se blong kam wan jif, yu mas kilim pig be oli no rilaesem se kilim pig hemi smol pat blong hem nomo. Wetem kaen fasin ia, i mekem se fulap long ol yangfala blong tede oli stat blong lusum tru mining blong pig-kiling mo rol blong wan jif. Hemia tu i mekem se i no gat respek long wanwan memba blong komuniti mo long ol wok blong ol jif long Vanuatu.

�U LUKLUK MO OL PRINSIPOL BLONG VIRADORO

1 Lukluk blong Viradoro long Vanuatu bifo mo afta long independens

　　Viradoro hemi wan long ol jif we hemi bin ripresentem voes blong olgeta jif truaot long Vanuatu long rod blong tokbaot independens. Wetem smol save we hemi gat mo bigfala ekspiriens we hemi gat folem ol defren wok we hemi bin mekem bifo long independens, hemi bin gat sam lukluk long wanem Vanuatu i save mekem. Tru long ol tingting, lukluk, toktok, mo bilif blong hem, hemi bin talemaot se Vanuatu hemi ples blong jif. Gavman mo jos oli stap aninit long responsibiliti blong jif. Viradoro hemi bin talem se gavman mo jos tufala i jes kam be jif hemi stap bifo finis. Long tingting mo lukluk ia nao, we hemi bin mekem se Viradoro hemi bin go insaed long politik. Hemi bin ting se afta long independens bambae hemi go bak blong stap long nakamal blong hem wetem ol pipol blong hem, mo sipos gavman i wantem wan samting bambae hemi askem long hem olsem papa mo mama blong ol pipol.
　　Wetem tingting ia yet tu i bin mekem se Viradoro hemi bin askem long let Walter Lini stret afta long independens taem hemi bin visitim Labultamata bakegen se, wanem kaen jif nao bambae hem wetem gavman we hemi bin lidim bambae i lukaotem, jif we i stap long nakamal o jif we bambae oli jes ilektem. Taem ia nao, let Walter Lini hemi bin talem blong ansa long kwestin blong Viradoro, se bambae oli wok wetem jif we hemi stap long nakamal. Afta long hemia, Viradoro hemi stap wet blong luk se toktok ia bambae hemi kamtru be nogat. Stat long 1980 kam kasem long 1989, toktok ia i no bin kamtru. Gavman hemi gohed blong setemap Nasonal Kaonsel blong ol Jif we fulap team yumi save long hem olsem Malvatumauri. Hemia i no wanem we Viradoro hemi bin tingting, lukluk mo toktok long hem.
　　Taem tingting mo toktok blong Malvatumauri hemi bin kam antap, Viradoro hemi bin mekem i klia long gavman se hemi no agri long tingting ia tru long wan konggres we hemi bin stap long Tautu long Malekula. Viradoro hemi bin talem se ol jif bambae gavman i no save pem olgeta blong mekem ol wok blong olgeta blong mekem sua se oli wok aotsaed long sistem blong gavman. Hemi bin talem olsem from we hemi talem se gavman hemi blong jif mo olgeta we oli wok long gavman oli ol pikinini blong jif. Evri samting we gavman hemi mekem hemi blong jif mo sipos gavman i mekem wan rong bambae jif nao hemi gat raet blong jajem. Be sipos gavman i stap kipim Malvatumauri olsem wan sekson o dipatmen blong hem, bambae jif i nomo gat paoa. Be taem evriwan i no bin agri long tingting blong Viradoro mo gohed blong setemap Malvatumauri, Viradoro hemi bin disaed blong wokbaot aotsaed long sistem ia kam kasem long tede.
　　Viradoro hemi bin talem tu long taem ia, se ol jif bambae i no gat ileksen blong olgeta be wanwan jif bambae hemi lukluk mo jusum jenis blong hem long taem we hemi ting se hemi rere mo jenis blong hem tu hemi rere. Hemi bin talem olsem from we hemi no ting se bambae yumi jes faenem jif long taem blong ileksen. Hemi bilif strong se jif hemi bin stap bifo ileksen hemi kam. Hemi bin talem tu se sipos ileksen hemi kam olsem fasin blong faenem ol jif, bambae i gat fulap raorao from eni kaen man nomo i save go insaed mo fulap taem bambae i no gat respek long ol jif. Kam kasem long tede, Viradoro i no jenisem tingting mo lukluk blong hem yet long isu ia.
　　Afta we hemi bin luk se gavman mo ol lida blong hem oli stat blong go long defren rod, long 1989 Viradoro hemi bin putum ol tingting blong hem mo givim long gavman long hao hemi ting se hemi stret blong Vanuatu i wok folem wetem ekonomik self rilaens blong hem. Gavman i bin lukluk long ol tingting ia mo oli bin apruvum. Viradoro hemi bin askem from wan nakamal blong hem wetem 100,000,000 vatu olsem kaekae blong hem. Hemi bin putum tingting ia blong gavman blong Franis mo Inglis tru long gavman blong Vanuatu blong givim mane blong projek ia. Be kam kasem long tede Viradoro hemi stil wet long mane o projek ia. Tede hemi luk olsem i nomo gat eni wan long gavman oli save long projek ia mo pepa ia tu mo i luk olsem i nomo gat eni long ol rekod blong gavman long ol yia ia kam kasem long tede.
　　Viradoro hemi bin putum tingting ia from bilif blong hem mo had wok we hemi bin mekem kam kasem long independens. Hemi bin talem se taem tufala gavman blong Franis mo Inglis i bin kam long Vanuatu, i no gat eni man i bin askem tufala blong kam. Tufala i bin kam long on tingting blong tufala mo taem tufala i kam stap mo ol jif oli bin akseptem tufala, yumi wetem tufala i bin usum evri samting, mane, kaekae mo mekem se basket blong ol jif blong Vanuatu hemi bin emti gud. Hemi tru se tufala i karem sam gudfala samting olsem skul, jos mo meresin be bifo tufala i go, tufala tru long Vanuatu Gavman i mas fulumap bakegen basket ia blong ol jif blong Vanuatu oli save lukaotem ol pipol blong olgeta wetem.
　　Hemi gud blong yumi evriwan i save taem Viradoro hemi bin stap mekem ol wok bifo mo afta long independens, hemi bin mekem from we hemi laekem kaontri ia mo ol pipol blong hem. Mo i gud tu blong mekem i klia se taem hemi mekem ol wok mo ol tingting ia, hemi tingting blong hem wan nomo we God i givim long hem olsem wan lida. So i gud blong yumi evriwan i save, se man olsem Viradoro we hemi bin mekem fulap samting blong helpem ol pipol blong Pentikos mo Vanuatu long taem bifo mo afta long independens, mo sipos yumi mekem hem i harem nogud, bambae Vanuatu tu bambae i harem nogud from Vanuatu hemi pikinini blong hem.

2 Bilif mo prinsipol blong Viradoro tru long laef blong hem

　　Viradoro hemi wan long ol las ni-Vanuatu we lukluk, tingting, toktok, mo wok blong hem hemi defren truaot long laef blong hem. Hemi wan man we i gat bigfala respek long wanwan man, woman mo pikinini we oli liv long Vanuatu. Hemia sam long ol prinsipol mo bilif blong hem long laef blong hem. Folem bilif mo prinsipol blong laef blong hem, hemi mekem se fulap man, woman mo pikinini oli faenem hemi had blong andastanem hem. Buk ia hemi traem blong talemaot sam long ol prinsipol ia long yumi wetem tingting se bambae hemi save helpem yumi long laef blong yumi wanwan, komuniti, aelan mo kaontri olsem Vanuatu.

2-1 Kastom, jos mo gavman

　　Viradoro hemi bilif strong se kastom, jos mo gavman oli wan nomo. Hemi gohed blong talem se trifala samting ia, oli bin stap wetem man Vanuatu long taem bifo jos we ol misinari oli bin karem i kam, mo gavman we Inglis mo Franis i bin statem long 1914. Hemi tru se man Vanuatu i no bin save long nem ia God, be ol olfala blong yumi long bifo oli bin save se i gat wan man we i moa hae i winim ol narafala man we hemi bin stap lukaotem ol bubu blong olgeta i kam kasem long olgeta mo ol pikinini blong olgeta. Long wok blong trifala samting ia, kastom, jos mo gavman, jif nao hemi sipos blong lukaotem olgeta evriwan blong mekem sua se oli wok gud tugeta oltaem blong i gat pis, joe mo uniti long Vanuatu. Viradoro hemi talem olsem, from we taem jos mo gavman tufala i bin kamtru long Vanuatu, jif hemi bin stap finis mo jif ia nao hemi bin givim raet long tufala blong save kam insaed.
　　Afta we jif hemi bin givim raet ia long jos mo gavman blong kam insaed long Vanuatu, jos mo gavman, tufala i nomo respektem jif tru long wok, toktok mo tijing blong tufala long ol pipol blong Vanuatu. Long fasin ia nao, i mekem se fulap gudfala fasin mo tijing blong laef long Vanuatu hemi bin stat blong go lus. Long taem ia tu, i bin stat blong gat brekemdaon long wok mo respek long ol jif. Problem ia hemi kam bigwan moa from jos mo gavman i no save wok tugeta long fulap taem mo tufala bodi ia tu i stap faet blong hu nao blong lidim ol pipol blong Vanuatu. Hemia i bin mekem se i bin gat tumas konfusen long laef blong ol pipol blong Vanuatu kam kasem long tede.
　　Taem tingting mo toktok blong independens i bin stap gohed, Viradoro hemi bin ting se wetem independens we man Vanautu nomo hemi ronem, bambae tingting ia hemi save kamtru bakegen mo stretem konfusen ia. Be taem yumi kasem independens finis, tingting mo lukluk hemi jenis bakegen. Hemi mekem se yumi folem bakegen wanem we jos mo gavman blong Inglis mo Franis i bin statem mo livim i stap. Hemi ova long twenti yia nao afta long indepedens mo tingting mo lukluk ia i no jenis yet.
　　Tede, tingting, toktok mo sam wok i stap gohed finis blong stretem ol problem ia be wan samting we hemi no klia yet long Viradoro hemi tufala kwestin ia: hu nao jif ia we bambae gavman i givim bak paoa long hem, mo wanem kaen paoa ia nao we gavman bambae hemi jes givim bak long ol jif. Tede, i gat plante defren kaen jif we yumi gat long Vanuatu semak olsem long team blong ol bubu blong yumi bifo i kam. Be i gat wan samting nomo we hemi defren long taem blong ol bubu blong yumi long bifo mo long yumi long tede, hemi fasin mo rod we ol bubu blong yumi oli bin folem blong jusum ol defren jif long wanwan komuniti blong yumi. Bifo ol bubu blong yumi oli bin jusum jenis blong olgeta tru long ae blong olgeta se man ia nao hemi rere blong tekem ova ol responsibiliti blong lukaotem ol pipol tru long wok mo fasin blong hem. Bambae sam long yumi i talem se toktok ia hemi no tru long ol eria we jif o lidasip i folem laen. Be hemi tru tu se nomata long fasin o rod ia, man we bambae hemi tekem ova responsibiliti ia hemi mas pruvum tu tru long wok mo fasin blong hem se hemi rere blong tekem ova ol wok ia.
　　Long tingting mo lukluk blong Viradoro, kam kasem long tede, hemi no klia yet, from fulap long ol jif we yumi gat long tede oli kamaot tru long ol defren fasin olsem tru long had wok blong wanwan famle, from oli gat mane, from graon, from oli kilim pig, from we oli big man long gavman o jos o insaed long bisnes, mo tru long ileksen. Be long Viradoro, jif ia we hemi toktok long hem hemi stap bifo finis i kam. Mo jif we hemia, hemi jif blong ol pipol. Wok blong jif ia hemi blong hemi mekem sua se Vanuatu i stap gud oltaem long pis joe mo uniti. Mo tu jif we hemia, hemi wan we ae blong man hemi bin luksave long hem mo jusum hem olsem jenis blong man.

2-2 Fasin mo rod blong kam wan jif o lida

　　Viradoro hemi talem se blong kam wan lida, hemi had wok mo bambae hemi tekem taem. Blong kam wan lida o wan jif hemi wan longfala rod we yumi evriwan i mas folem truaot long laef blong yumi. Viradoro hemi talem tu se yumi evriwan, man, woman o pikinini we hemi bon long Vanuatu, hemi wan lida long wei blong hem. Lukluk mo tingting ia i nomo stap long fulap ples blong yumi long Vanuatu from fulap man o woman oli nomo luksave. Fulap long ol lida o ol jif blong tede oli nomo wantem luksave mo akseptem se oli lida o jif long eria ia nomo be i no blong go long ol eria we oli no sipos o oli no fit blong go long hem.
　　Viradoro hemi bin soem tru long laef blong hem se tingting mo fasin blong jusum ol lida folem ae blong man hemi save wok gud mo yumi save kasem fulap gud samting sipos yumi folem rod mo fasin ia. Fulap man o woman bambae oli talem se fasin ia i nomo save wok sipos i gat fulap lida o jif long wan eria. Viradoro bambae hemi no agri tumas wetem tingting o toktok ia. Tru long laef blong hem mo lidasip blong hem, hemi bin pruvum se yumi save mekem. Taem hemi bin statem vilij blong Labultamata mo hemi bin lukaotem distrik blong Aute olsem wan asesa, evri narafala jif o lida oli bin respektem mo koperet wetem. Viradoro nomo hemi bin jusum ol asisten blong hem taem we wok blong hem i bin kam plante tumas. Hemi bin jusum Jif Tagaro Moltara mo Jif Pita Tamata mo evri narafala jif o lida oli bin agri long hem mo wok wetem olgeta long level blong asesa.
　　Semak long vilij blong Labultamata, tufala i bin liv mo wok tugeta wetem wan narafala bigfala jif mo lida we nem blong hem hemi Viralalau o nem blong hem long jos hemi Clement Molture. Wan long ol impoten lesen we yumi evriwan i save lanem tru long laef blong tufala bigfala jif o lida ia, hemi hao tufala i bin wok tugeta mo lidim sem grup blong ol pipol. Fes samting we tufala i bin luksave hemi ol defren skil, save mo strong blong wanwan blong tufala mo tufala i bin akseptem mo respektem long tingting, toktok mo aksen blong tufala. Folem fasin mo lukluk ia, tufala i bin serem ol responsibiliti i folem. Viradoro mo Viralalau tufala i bin luksave se hemi impoten blong wok tugeta, so hemi mekem se tufala i bin serem ol responsibiliti ia. Viradoro hemi bin lukaotem long ol samting olsem tingting o toktok we i bin kam long aotsaed long vilij o aelan mo blong karemaot ol tingting ia long vilij, Viralalau nao hemi bin lukaotem. Wetem fasin ia, tufala bigfala lida o jif ia i bin save mekem fulap samting olsem bildim wan bigfala joshaos, nakamal, skul, wota saplae, mo rod long vilij blong Labultamata mo distrik blong Aute tu.
　　Tede, fulap man mo woman oli nomo wantem luksave se sipos yu gud blong planem ol kaekae long garen, yu nao yu lida o jif blong garen, hemi semak tu long pig, kastom meresin, o ol narafala samting olsem. Be lida o jif we Viradoro hemi toktok long hem hemi wan we hemi lukaot long olgeta narafala lida o jif ia wetem ol pipol blong olgeta. Lida o jif we hemia, hemi no gat eni samting be ol samting blong hem ia nao hemi ol pipol. Long sem fasin, evri samting we ol pipol ia oli mekem o oli gud long hem, hemi blong jif o lida blong olgeta o oli mekem long nem blong hem from oli save se sipos eni samting we bambae i hapen long olgeta long gud taem o rabis taem, man o lida o jif ia nao bambae i save helpem olgeta. Be jif o lida o man ia tu hemi luksave mo respektem ol save, skil, komitmen mo lidasip rol blong wanwan memba blong konumiti blong hem mo bambae hemi presentem olgeta wanwan long fasin we oli hapi long hem.
　　Lida o jif ia we Viradoro hemi toktok long hem, hemi wan we hemi olsem kapten blong sip we yumi evriwan i stap ron long hem long gudfala taem mo long nogud taem. Viradoro hemi talem se hemi olsem kapten we i holem bigfala padol mo stanap long as blong kenu blong yumi long taem we yumi wantem travel i go long narafala ples o aelan. Wok blong man o lida o jif ia nao, hemi blong mekem sua se yumi mas kasem ples ia mo go insaed long pasis gud. Bambae hemi stanap dei mo naet o long gud taem mo nogud taem. Be taem hemi lukaot long sip ia, sipos i gat eni samting we hemi lukim o faenem, hemi mas givim wan long ol lida aninit long hemi we i gat save mo hemi lukaot long eria ia. Rol blong lida o jif o kapten ia hemi blong mekem sua se hu we hemi tekem responsibiliti ia, hemi mekem gud blong helpem evriwan.
　　Tede, ol rol mo responsibiliti ia ol man, woman mo pikinini oli nomo luksave long hem. Hemia i mekem se wanwan famle, komuniti, aelan mo kaontri blong Vanuatu i nomo save ron gud. Fasin ia hemi bin kamaot folem nomo se ol man, woman mo pikinini i nomo save luksave mo akseptem rol mo responsibiliti blong olgeta insaed long wanwan haos, komuniti mo kaontri. Kaontri blong Vanuatu o wanwan komuniti blong yumi oli olsem kenu o haos we yumi travel o liv long olgeta. Yumi evriwan we i liv long Vanuatu o long wanwan aelan o komuniti blong yumi, yumi plei impoten rol blong kipim sip ia blong hemi ron o kipim haos ia blong hemi stanap strong. Viradoro hemi talem se blong sip ia hemi ron gud, yu we yu stap olsem kapten, yu nomo save go daon blong belaot wota long kenu, o yu we yu gud blong belaot wota, yu no save go antap blong kam kapten. Hemi semak long haos, sipos yu we yu olsem pos, yu no save kam olsem natanggura o yu we yu natanggura yu no save kam olsem pos. Sipos yumi evriwan i no agri mo akseptem ol defren rol mo responsibiliti aninit long lidasip we yumi gat mo wok tugeta wetem ol narafala lida o jif, bambae hemi mekem hemi moa had long yumi evriwan. Be blong sip ia i ron gud o haos ia hemi stanap oltaem, yumi evriwan i mas putum han, save, skil, mo tras blong yumi tugeta blong mekem i hapen.
　　Sipos wanwan long yumi i no wantem luksave mo akseptem naoia, long sem fasin ia bambae ol pikinini mo ol pikinini blong olgeta we bambae oli kam bihaen bambae oli save moa. Blong yumi mekem sua se yumi no livim wan wol we ol pikinini blong yumi mo ol pikinini blong olgeta oli harem nogud long hem, yumi evriwan i nid blong putum yumi daon mo luksave wea yumi bin go rong mo traem blong jenisim blong i save kam gud moa. Blong mekem hemi wok long kaontri blong yumi Vanuatu o wanwan komuniti blong yumi, yumi nid blong stat blong luksave mo akseptem se sipos hu long yumi hemi gud long wan samting, bambae hem nao bambae hemi save lidim yumi long hem. Mo hem nomo bambae hemi jusum jenis blong hem taem we hemi ting se taem blong hem hemi rere blong hemi mekem. Long sem fasin ia nao, we ol narafala lida o jif bambae oli save folem. Tru long fasin ia nomo, yumi save gat pis, uniti mo respek bakegen long Vanuatu.

2-3 Pig-kiling

　　Pig-kiling hemi wan long ol impoten pat long rod blong kam wan jif o lida long Vanuatu bifo long taem blong ol bubu blong yumi kam kasem long yumi tede speseli long ol eria we jos i no bin sakemaot olgeta. Wan long ol bigfala problem we yumi lukim tede long Vanuatu we i mekem respek long ol jif mo wok blong ol jif hemi go daon bigwan, hemi fasin we man hemi wantem karem taetel blong jif o lida nomo be hemi no wok from o save ol responsibiliti mo rol blong hem olsem wan jif o lida.
　　Wetem tingting ia, hemi mekem se klosap evriman o famle oli wantem blong wanwan o evri pikinini blong olgeta insaed long famle ia blong oli go insaed long bisnes blong kilim pig. Fasin ia mo tingting ia hemi mekem se i gat tumas jif raon long Vanuatu tede mo fulap long olgeta oli no save rol blong olgeta insaed long komuniti blong olgeta. Hemi no wan sapraes long wan man olsem Viradoro, we hemi lukim pig-kiling olsem wan las samting insaed long longfala rod blong kam wan jif o lida. Kilim pig hemi flaoa nomo blong talemaot o pruvum long evriwan se man, woman o pikinini ia hemi bin mekem evri samting be i gat tumas pig, kastom mat mo kaekae i stap yet i mekem se hemi wantem go insaed long bisnes blong pig. Hemia nao rod we Viradoro wetem ol narafala jif we hemi bin folem olgeta oli bin folem.
　　Long Vanuatu tede, i gat fulap raorao mo i nomo gat respek long wok blong ol jif from we yumi gat tumas jif mo fulap long ol jif ia oli nogat inaf expiriens blong wok wetem ol pipol. Fulap long olgeta oli no bin wok from o oli bin karem from we oli gat mane blong pem o from oli bigman long politik be oli no gat eni o inaf expiriens blong lukaotem ol pipol. From yumi gat tumas jif o lida hemi mekem se i nomo gat klia daereksen mo mekem se ol pipol oli lus insaed long faet blong ol jif o ol lida we yumi gat tede long Vanuatu. Faet blong lidasip i stat long vilij i go kasem long nasonal level.
　　Blong muvum Vanuatu aot long problem ia, Viradoro hemi talem strong se bambae yumi no usum fasin blong kilim pig olsem wan wei nomo blong kam wan jif o lida mo yumi mas go bak long rod mo fasin blong jusum wan jif o lida tru long ae blong man. Wetem fasin o wei ia, bambae hemi mekem se sileksen blong wan jif o lida bambae i dipen tumas long wok blong hem mo fasin blong hem. Viradoro hemi bilif strong se sipos yumi go bak blong bihaenem rod o fasin ia, bambae wok mo respek blong ol jif bambae i save kam bakegen long Vanuatu.

2-4 Fasin blong lukaotem graon

　　Graon mo fasin blong lukaotem graon long Vanuatu hemi wan had isu we fulap man oli no wantem tokbaot tumas. Tede long Vanuatu hemi wan long ol isu we evriman, woman mo pikinini oli toktok long hem. I gat moa raorao long graon long Vanuatu bitwin long ol komuniti, bitwin long ol famle mo bitwin long ol memba blong wan famle. Hemi kam wan long ol bigfala problem long nasonal, rijonal, komuniti, mo famle level. Folem namba blong lan problem long Vanuatu, hemi mekem se i gat fulap tingting, toktok mo wok we i stap gohed naoia blong faenem ansa blong problem ia insaed long gavman, komuniti mo long wanwan man, woman mo pikinini.
　　Long bilif blong Viradoro, i gat inaf graon yet long Vanuatu blong lukaotem evriman, woman mo pikinini we oli stap long Vanuatu long tede mo plante moa we oli no bon yet. Hemi talem se graon we i stap long Vanuatu hemi blong yumi evriwan. I no gat wan man, woman o pikinini bambae hemi save talem se graon ia hemi blong mi. Hemi no posibol tu blong wan man, woman o pikinini blong hemi talem se graon blong mi i stat long ples ia i go kasem long ples ia. Sipos wan man, woman o pikinini hemi talem olsem, hemia hemi no tru. I no gat wanwan man, woman o pikinini hemi onem graon long Vanuatu. Graon, yumi evriwan i onem mo wanwan long yumi i onem raet blong usum graon be wanwan long yumi i no onem graon.
　　Bambae fulap man, woman mo pikinini bambae oli no save agri wetem tingting o toktok ia. Hemia, hemi nomal nomo from fulap samting we i bin hapen mo ol tij we wanwan long yumi i bin karem long ol papa mo mama blong yumi wanwan oli defren. Fulap pipol tu bambae oli talem se wanwan man, woman o pikinini hemi onem graon olsem we konstitusen blong yumi hemi talem. Be hemi gud tu blong yumi evriwan i lukluk gud long toktok we i stap long konstitusen ia we hemi talem olsem se graon bambae hemi go bak long ol lanona mo hemi talem tu se fasin blong usum graon bambae hemi folem fasin blong kastom. Sipos yumi sidaon kwaet mo tingting long hem, hemi klia se yumi bin wantem ol graon we hemi bin stap aninit long han blong ol man aotsaed long Vanuatu olsem, Inglis mo Franis blong hemi kam bak long ol pipol blong Vanuatu. Be wanem we hemi no klia yet, se graon ia bambae hemi go bak long wanwan man, woman o pikinini o blong hemi go bak mo folem fasin blong kastom we yumi evriwan i gat raet blong usum.
　　Problem we Vanuatu hemi fesem yet tede, hemi from ol pipol blong Vanuatu mo ol lida blong Vanuatu oli no bin andastanem o kliarem smol toktok ia long fes ples afta long independens. Hemi no klia yet se ol lida blong Vanuatu oli bin luksave problem ia o nogat. Raet blong usum ol graon tu hemi no open long eni man. Blong wan man, woman o pikinini hemi wantem usum raet ia blong hem, hemi mas askem long jif o lida we hemi lukaot long eria ia.
　　Long tingting blong Viradoro, problem ia i no save finis long Vanuatu gogo ol pipol blong Vanuatu oli kam blong akseptem se graon long Vanuatu bifo i kam hemi blong yumi evriwan be i no blong wanwan man, woman o pikinini. Mo tu, blong ol pipol blong Vanuatu oli kam blong luksave mo akseptem se graon bambae hemi stap nomo aninit long han blong jif ia we hemi blong ol pipol. Jif ia we tingting, toktok mo wok blong hem, hemi blong mekem sua se evriwan long Vanuatu i liv long pis, joe mo uniti oltaem.
　　Mo jif o lida ia nao hemi gat raet blong talem long wanwan man, woman o pikinini wea blong wok long ol graon blong yumi. I gat tufala samting we hemi impoten blong yumi evriwan yumi save long hem. Feswan, jif o lida ia hemi mas save long rod blong evri graon blong yumi we hemi gat responsibiliti ova long hem mo namba tu, se blong yumi evriwan i gat ples long graon blong yumi, eni tingting we eniwan long yumi hemi wantem mekem, hemi mas askem long jif o lida ia blong hemi save soem hem wea blong karemaot tingting o wok ia long hem.
　　Bambae fulap pipol oli faenem i had blong akseptem tingting o toktok ia. Fulap pipol tu bambae oli stat blong askem ol kwestin se, olsem wanem long jif o lida blong wanwan famle, laen o komuniti insaed long wok blong graon. Ol tingting, toktok mo wok we Viradoro hemi stap talem long laef taem blong hem, hemi no karemaot wok o rol blong ol defren jif o lida ia. Be wanem we jif o lida blong ol pipol ia hemi mekem hemi blong mekem sua se wok o rol blong ol narafala jif o lida hemi gohed stret oltaem.
　　Viradoro, tru long laef blong hem kam kasem long tede, hemi liv, tingting, toktok, mo wok folem ol prinsipol ia nao. Bambae yu neva harem hem long eni taem blong hemi talem se graon blong hem i stat long ples ia i go kasem long ples ia. Bambae yu neva harem hem tu blong rao from graon o ronemaot eni man, woman o pikinini from graon. Long tingting mo bilif blong hem, eni man, woman o pikinini we hemi raorao from graon, hemia nao ol pipol we wan, oli no save long rod blong graon o tu oli jes kam nomo mo mekem se oli no sua long ples blong olgeta. Kam kasem long tede, Viradoro hemi neva makem o serem ol graon. Hemi talem se sipos yu makem o serem ol graon bambae oltaem i gat faet mo tu namba blong ol pipol hemi stap gro be graon hemi stap semak nomo, so sipos moa pikinini o pipol long aotsaed i kam insaed be graon we yu makem o serem hemi smol tumas bambae hemi save statem moa problem.

2-5 Fasin blong pem woman mo praes blong wan woman

　　Viradoro hemi talem olsem se God i bin mekem man mo woman blong tufala i save liv tugeta samtaem long laef blong tufala. Long 1978 taem ol jif blong Pentikos oli bin wantem putum praes blong woman blong man hemi pem sipos hemi wantem maredem. Long taem ia evri jif blong Not Pentikos oli bin mit long wan ples we oli singaotem Lahalbulbulu mo toktok long isu ia. Long taem ia evri jif oli bin agri se praes blong pem woman long Not Pentikos hemi tu pig nomo. Be Viradoro hemi no bin agri wetem tingting ia.
　　Viradoro hemi no bin agri long tingting mo praes ia folem ol risen ia. Viradoro hemi talem se woman, yu no save putum praes long hem from we man i no pem woman olsem we yu pem ol samting long stoa. Woman i no gat praes blong hem. Woman hemi stamba blong laef mo famle. Hemi bin talem se taem man mo woman tufala i mared mo tru long mared ia nao, hemi openem rod blong tufala famle blong man mo woman blong save wok tugeta. Long sem fasin o tingting, taem man i givim ol pig o mane long famle blong woman, hemi saen blong respek mo stat blong niufala rilesenship ia bitwin long tufala famle ia. So Viradoro hemi bin talem se blong man i soem gladhat blong hem long famle blong woman blong hem, hemi save givim wan pig i go kasem ten pig. Hemia, bambae hemi dipen tumas long hao mas pig o mane we man ia hemi gat mo sipos famle blong woman ia oli hapi long hem.
　　Viradoro hemi bin talem olsem from we hemi talem se evriman oli mas mared samtaem long laef blong olgeta mo sipos ol jif oli agri long wan praes we sam man i no save givim, bambae hemi save statem fulap problem long laef blong famle ia. Mo tu sipos, i gat wan fiks praes blong ol woman bambae i mekem se ol woman i kam olsem wan tul nomo mo man i save usum olsem we hemi wantem from hemi bin pem. Long tingting mo lukluk ia, bambae ol woman oli lusum tru valiu blong olgeta olsem stamba blong wan famle mo sosaeti. Be taem Viradoro hemi bin talem ol tingting mo ol toktok ia, evri jif we oli bin stap long miting ia oli no bin agri wetem hem mo oli disaed blong sendemaot hem long miting ia. Tede long Not Pentikos, toktok blong Viradoro hemi stap yet. Evri man we oli mared long Not Pentikos, oli nomo fasem tu pig olsem we ol jif oli bin agri long hem long taem ia be oli folem tingting mo toktok blong Viradoro we hemi bin talem se bambae hemi stat long wan pig i go kasem long ten pig.
　　Hemi interes tu blong luk se fulap man long Not Pentikos tede oli stap long ten pig nomo long evri mared.(3) Hemia bakegen hemi had blong yumi talem se hemi gud o i no gud. Sipos ol man we oli stap fasem ol pig mo famle blong woman ia oli lukim long sem wei o fasin olsem we Viradoro hemi bin lukim mo talem long taem ia, sipos hemi olsem bambae hemi oraet be sipos oli mekem long wan narafala tingting we blong olgeta nomo, hemia hemi no stret. From mared mo ol samting olsem pig mo kaekae we tufala famle i joen tugeta long hem long taem blong mared hemi sipos blong putum gudfala mo strong fandesen long laef blong niufala famle ia blong wokbaot long hem. Be sipos ol tingting ia oli no stret, oltaem bambae i gat problem long hom mo laef blong niufala famle ia.
　　Taem tingting mo toktok ia i bin kam antap long nasonal level tru long level blong pati blong go insaed long Malvatumauri Nasonal Kaonsel blong ol Jif, Viradoro hemi no bin agri long tingting mo toktok ia. Hemi no bin agri long ol tingting mo toktok ia folem sem risen we hemi bin givim long ol jif blong Not Pentikos. Hemi bin mekem tingting mo toktok ia i klia long wan miting we i bin stap long Tautu long aelan blong Malekula long 1976. Be bakegen miting ia i no bin agri long ol tingting mo toktok blong Viradoro, i mekem se tede eni mared bitwin long tufala defren aelan oli mas putum 80,000 vatu. Buk ia hemi no traem blong talem se hu nao hemi raet be hemi wantem talemaot tingting, lukluk mo toktok blong Viradoro long ol defren isu ia mo livim yu blong yu mekem on jajmen blong yu.

2-6 Fasin blong lukaotem ol pikinini

　　Buk ia hemi no traem blong talem long yu hao blong lukaotem ol pikinini blong yumi be wanem we buk ia hemi wantem mekem hemi blong usum laef mo tijing blong Viradoro blong demonstretem sam long ol bigfala tingting mo toktok we yumi save laef long hem olsem wan famle. Blong statem, i gud blong yumi lukluk smol long famle laef blong Viradoro. Viradoro hemi bin mared long trifala defren woman. Fes woman blong hem nem blong Kare, afta we Kare hemi ded hemi bin maredem Diana Mudali, mo taem Diana hemi ded, hemi maredem Selina Tevi we tufala i stap kasem tede. Long trifala woman ia, hemi gat 14 pikinini evriwan, seven boe mo seven gel.
　　Wetem trifala woman we hemi bin maredem olgeta mo 14 pikinini we hemi gat, hemi mekem long evriwan i semak nomo. Bambae yu neva harem Viradoro blong hemi separetem ol pikinini blong hem folem ol defren mama we oli bin karem olgeta. Wan long ol impoten samting we hemi stap talem long ol pikinini blong hem se hu aot long ol 14 pikinini blong hem we hemi gud long wan samting, hemi mekem blong olgeta evriwan. Hemi talem se sipos wan hemi gud blong planem taro o kava, hemi planem blong olgeta evriwan. Tingting mo toktok ia i save wok long wan famle, vilij, komuniti, aelan, mo Vanuatu sipos evriwan i luksave mo agri blong wok folem.
　　Viradoro hemi lukaotem 14 pikinini blong hem long fasin olsem folem ol risen ia. Wetem tingting mo toktok we hemi stap talem long olgeta se wanem we wan long olgeta i save mekem hemi blong olgeta evriwan, bambae hemi mekem se i gat pis, joe, uniti, mo sekiuriti insaed long famle oltaem. Long fasin ia, bambae i no gat jalus insaed long famle. Mo tu, sipos evriwan i luksave mo respektem wanwan long olgeta long wanem we wanwan long olgeta i gud long hem, olgeta ia oli gro i kam antap long ol defren eria we wanwan long olgeta hemi gud long hem blong evriwan i save kaekae long hem. Tingting mo toktok ia hemi impoten tumas from i gat fulap tingting mo toktok we i stap kam antap tede long Vanuatu long saed blong divelopmen be yumi tingbaot tu se graon hemi no gro be namba blong ol pipol hemi gro. Sipos yumi wanwan i no luksave mo akseptem tingting mo toktok ia, bambae fulap famle, komuniti, aelan, mo kaontri bambae hemi brekemdaon.
　　Wetem tingting mo toktok ia, Viradoro hemi stanap strong se Vanuatu i save tekem lid blong lanem ol defren kaontri long Melanisa, Pasifik mo wol blong mekem sua se i no gat man, woman o pikinini hemi hangere o ded from yumi evriwan i save serem eni smol samting we yumi gat. Wetem fasin ia bambae wanwan man, woman mo pikinini bambae hemi kasem bak tras mo respek long narafala man, woman mo pikinini. Long sem fasin ia, bambae yumi lukim ol famle, komuniti, aelan, mo Vanuatu olsem wan kaontri blong muv fowod long laef.

2-7 Fasin blong adoptem pikinini

　　Long Vanuatu fasin blong adoptem ol pikinini i stat bifo finis long taem blong ol bubu blong yumi i kam. I gat ol defren risen blong adoptem ol pikinini. Samtaem narafala man mo woman tufala i adoptem pikinini from sam famle rilesenship speseli long taem we mama o papa blong pikinini hemi ded o from famle ia i no gat eni pikinini o from we famle ia i gat evri pikinini boe mo oli wantem adoptem wan gel o hemi semak tu sipos evriwan oli gel so famle ia bambae hemi adoptem wan boe. Viradoro hemi wan long ol pikinini we narafala papa mo mama tufala i bin adoptem hem afta we mama blong hem hemi ded taem hemi bin smol boe nomo. Plante long ol adopsen we i bin hapen long taem bifo i kam kasem long yumi long tede, hemi stap insaed long samfala famle arenjmen nomo.
　　Tede, tingting mo rilesenship ia hemi go aotsaed long famle. Yumi lukim ol pikinini we ol papa mo mama oli adoptem olgeta long ol narafala aelan mo kaontri. I gat fulap defren tingting o toktok long wae nao tingting blong adoptem ol pikinini hemi go aotsaed long ol defren aelan mo narafala kaontri. Viradoro hemi wan long olgeta pipol we hemi bin statem tingting mo openem do ia long Pentikos mo long Vanuatu. Bilif mo laef blong Viradoro we hemi stap olsem papa mo mama blong evriman long aelan blong Pentikos mo Vanuatu hemi stat bifo long independens i kam kasem long tede. Hemi bilif strong mo karemaot rol blong hem blong lukaotem eni man, woman mo pikinini we hemi kam raon long eria we hemi lukaotem. Hemia i bin mekem se bifo long independens, hemi bin lukaotem ol man, woman mo pikinini blong Vanuatu mo ol man, woman mo pikinini we oli bin kam long aotsaed long Vanuatu.
　　Wan long olgeta pipol we hemi bin lukaotem olgeta long taem ia mo afta hemi adoptem hem olsem pikinini blong hem, hemi Masanori Yoshioka, wan long tufala man we i raetem buk ia. Kastom nem blong Masanori Yoshioka, hemi Molmemea. Molmemea hemi wan Japanis. Stori blong Molmemea wetem Viradoro bambae hemi helpem yumi blong andastanem sam long ol tingting mo toktok we Viradoro hemi stap mekem.
　　Long 1974, Molmemea hemi bin kamtru long Labultamata. Hemi bin kamtru long taem we tufala gavman blong Inglis mo Franis i bin stap yet mo taem ia tu tingting mo toktok blong independens i bin stat blong kam antap. Hemi interes blong lukim from we Viradoro afta long taem blong Wol Wo II wetem ol Amerikan, hemi bin stat blong bildimap wan fraet bitwin hem mo ol Japanis. Be taem tufala gavman i bin sendem Molmemea blong kam mekem stadi blong hem wetem Viradoro, hemia i bin mekem Viradoro blong tingting plante long hem.
　　Afta longfala tingting mo toktok wetem Molmemea, Viradoro hemi bin disaed blong adoptem hem olsem pikinini blong hem. Be blong adoptem hem, Viradoro hemi bin givim wan pig blong Molmemea hemi kilim, mo bifo hemi kilim Viradoro hemi bin talem toktok ia long hem. Hemi bin mekem i klia long Molmemea se hemi fraet long ol Japanis afta long Wol Wo II we hemi bin stap long hem wetem ol Amerikan. Mo hemi talem long hem tu, se long Not Pentikos i gat sam man we oli save mekem laetning mo tanda sipos oli wantem spolem wan man, woman o pikinini o wan vilij sipos oli no hapi wetem ol man ia. Be evri taem afta we laetning mo tanda ia i kilim o spolem ol samting ia finis, bambae hemi mas kam bak mo go bak insaed long basket blong hem. Long lanwis blong Not Pentikos oli singaotem se raben bwagilo.
　　So Viradoro hemi bin talem long Molmemea se, sipos hemi bin kam wetem sam nogud tingting o toktok blong spolem hem wetem Vanuatu, pig we hemi kilim hemi jenisim Viradoro. Sipos eni nogud tingting o toktok we hemi bin kam wetem mo sipos doti blong hem i kam long bihaen bambae i no save kaekae Viradoro o ol pipol blong Vanuatu be bambae hemi kaekae pig ia.
　　Wetem tingting mo toktok ia yet i mekem se long taem blong toktok blong independens mo afta long independens, Viradoro hemi bin adoptem Ripablik blong Vanuatu olsem pikinini blong hem long evri tingting, toktok mo wok we hemi bin mekem mo hemi kontinu yet blong mekem long tede. Tingting mo fasin ia hemi mekem se Viradoro hemi nomo save silip gud long las twenti yia from pikinini blong hem Vanuatu, hemi nomo ron long wei o fasin we hemi bin lukim o wantem bifo mo afta long independens.
　　Tede, evriwan long Vanuatu oli wantem adoptem eni man, woman o pikinini we oli kam blong save. Wan samting we hemi no klia yet se, ol fasin blong adoptem ol man o woman blong aotsaed long Vanuatu o ol narafala aelan long Vanuatu we yumi stap lukim tede oli gat sam strong fandesen blong olgeta o nogat. Lukluk we i stap se fulap man o woman oli adoptem ol man o woman ia from oli wantem o save se bambae oli save kaekae tru long ol pipol ia nomo. Viradoro tru long tingting, toktok mo wok we hemi bin mekem mo adoptem ol pikinini blong aotsaed long Vanuatu mo Vanuatu, hemi klia se hemi no bin wantem eni samting long olgeta. Be i gat wan samting nomo we hemi bin wantem long ol pipol blong Vanuatu mo aotsaed long Vanuatu blong save. Viradoro hemi bin wantem mekem i klia long evriwan se jif o lida we i olsem hem, hemi stap bifo finis i kam mo yumi evriwan bambae i mas rere blong helpem tingting, toktok mo wok blong hem blong mekem sua se ol pipol oli stap long pis joe mo uniti oltaem long Vanuatu.

�V VIRADORO LONG OL DEFREN TAEM WE HEMI DEFENDEM RAET MO RESPEK BLONG OL JIF FOLEM WEI MO FASIN WE HEMI MEKEM LONG SAM LONG OL BIGFALA IVENT

　　Viradoro we fulap long ol pipol speseli ol jif oli save long hem olsem man blong spolem o no folem ol program. Viradoro hemi talem se olsem bigfala jif program blong hem i save kamaot longfala taem o sipos no i save kamaot long las minit blong mekem sua se i gat tras mo konfidens i stap oltaem long jif o wok blong jif. Folem risen ia nao we hemi lukim Viradoro i karemaot sam aksen long ol defren seremoni we fulap taem hemi no stap long program. Insaed long japta ia, bambae yumi lukluk long sam long ol aksen ia mo traem blong andastanem sam long ol risen bihaen long ol aksen ia.
　　Bambae yumi lukluk long sam long ol ivent ia olsem taem we nakamal blong ol jif we i stap long Pot Vila hemi bin open, Vanuatu At Festivol we hemi bin stap long Luganvil long aelan blong Santo, taem wan memba blong Vanuatu Mobael Fos (VMF) oli bin kilim hem long Santo, mo taem blong fesfala vot blong nogat tras long Let Fr. Walter Lini olsem Praem Minista blong Vanuatu long 1991.

1 Nakamal blong ol jif hemi open

　　Taem nakamal blong ol jif we hemi stap long Pot Vila i bin open, Viradoro hemi stap long Vila long taem ia. Viradoro hemi no bin stap long program blong dei ia. Be wetem lukluk mo tingting blong hem hemi bin lukim se hemi raet taem blong hemi talem wan toktok we bambae hemi inaf long dei ia. Long taem ia ol memba blong Malvatumauri we hemi Nasonal Kaonsel blong ol Jif long Vanuatu oli bin kam tugeta wetem ol narafala bigfala man blong witnesem dei ia. Ol memba blong Malvatumauri oli bin wearem wan unifom we hemi bin mekem se oli save standaot long taem ia.
　　Long taem we program blong dei hemi stat mo taem we oli kilim tamtam blong welkamem ol bigman we oli bin invaetem olgeta long dei ia oli sek we Viradoro insaed long ful kastom dres blong hem wetem wan bigfala basket hemi danis long rod i kam. Taem hemi kamtru long nasara blong nakamal ia, hemi go sidaon kwaet long wan kona long fored blong nakamal ia wetem basket blong hem. Taem Presiden blong Ripablik blong Vanuatu long taem Mr Fredrik Kalomuana Timakata hemi katem ribon blong ofisoli openem nakamal ia, Viradoro hemi karem basket blong hem mo hemi go hangem long baksaed blong nakamal mo hemi kam bak mo sidaon aotsaed blong harem ol toktok blong dei ia. Afta long ol toktok blong ol bigfala man blong dei ia be kamtru blong Viradoro wetem sidaon blong hem hemi mekem se ol oganaesa blong dei oli luk mo ting se hemi stret blong hemi givim wan smol toktok nomata we hemi no bin stap long program.
　　Taem oli bin invaetem Viradoro blong hemi givim wan smol toktok, hemi go bak insaed long nakamal mo karem basket blong hem wetem nalnal blong kilim pig we hemi bin karem basket blong hem wetem i kam bak aotsaed. Long taem we hemi stanap aotsaed, hemi bin karemaot wan mat blong sidaon we hemi putum long maot blong basket blong hem mo putum long gras blong putum basket blong hem long hem. Afta hemi karemaot tufala red mat blong Pentecost we tufala i bin stap insaed long basket ia mo openem tufala. Taem ia Let Fr. Walter Lini we haf bodi blong hem hemi no bin wok gud finis hemi bin glad tumas mo hemi stanap blong helpem Viradoro blong openem tufala mat ia. Afta long taem ia Viradoro hemi jes toktok.
　　Bifo Viradoro hemi statem ol toktok blong hem, hemi bin talem bigfala tangkiu long ol oganaesa blong dei ia blong givim long hem janis blong talem wan smol toktok. Hemi bin talem olsem se hemi stanap long nem mo hed blong evri jif we i stat long Tores long not i go kasem long Aneityum long saot blong Vanuatu. Hemi bin talem tufala bigfala toktok long taem ia. Wan long ol toktok ia hemi bin talem long ripresentetif blong tufala gavman blong Inglis mo Franis mo narawan long evriwan long Vanuatu.
　　Long Inglis mo Franis hemi bin talem olsem long tufala. Fesfala toktok hemi bin talem olsem se taem yutufala i bin wantem kam long Vanuatu ol jif blong Vanuatu wetem ol pipol blong olgeta oli bin save mo oli bin askem blong tufala i kam. Tufala gavman blong Inglis mo Franis i bin kam folem on tingting blong tufala. Nomata long hemia ol jif oli bin agri blong tufala i save stap wetem yumi. Afta we ol jif oli bin akseptem tufala blong stap long Vanuatu, yumi bin serem ol tingting, kaekae mo evri samting we yumi gat mo tede basket blong jif hemi emti gud. Viradoro hemi bin talem bigfala long tufala from ol gudfala samting we tufala i bin karem mo lanem ol man Vanuatu long hem olsem skul, meresin mo jos we tede hemi helpem Vanuatu wetem ol pipol blong hem long fulap wei. Be Viradoro hemi bin go on blong talem se tede we tufala i bin agri blong livim bak Vanuatu afta long independens long han blong ol jif mo ol pipol blong Vanuatu, tufala i mas fulumap bakegen basket blong jif ia blong hemi save lukaotem ol pipol blong hem wetem.
　　Namba tu toktok we Viradoro hemi talem long tufala hemi bin talem se, sipos tufala i bin kam long Vanuatu wetem sam nogud tingting o toktok we i save spolem ol jif wetem ol pipol blong olgeta, tede hemi brekemdaon nogud tingting o toktok ia blong i gat pis, joe mo hamoni oltaem long Vanuatu. Blong givim wan pikja long tufala, Viradoro hemi bin talem long tufala se long Vanuatu sipos i gat strongfala win mo solwota hemi raf be sipos ol man oli wantem kros blong go long wan narafala aelan, oli gat ol lif we oli save putum long solwota blong i save mekem se i gat gud taem blong oli save kros blong go long wan narafala aelan. Long taem ia, Viradoro hemi tanem raon mo soem wan lif we hemi bin putum long baksaed blong hem we long aelan blong Pentikos speseli long not oli usum long kaen taem olsem. Hemi bin talem sipos Inglis mo Franis tufala i kam long Vanuatu wetem eni nogud tingting o toktok we i save spolem Vanuatu wetem ol pipol blong hem, tede Viradoro hemi putum lif ia blong i save gat gud taem blong hemi save kros i go long Inglis mo Franis o ol narafala kaontri long wol.
　　Afta long tufala toktok ia, Viradoro hemi bin givim wan red mat long ripresentetif blong Inglis mo Franis olsem saen blong talem bigfala tangkiu long tufala from evri gud samting we tufala i bin karem i kam mo mekem long Vanuatu. Mo hemi bin givim tufala red mat ia tu olsem saen blong bildim niufala rod blong wok wetem tufala kaontri ia speseli long wok blong ol jif blong save mekem i kam strong mo gud moa.
　　Long ol jif mo ol pipol blong Vanuatu, Viradoro hemi bin talem se ol jif oli nid blong wok tugeta moa mo ol pipol oli mas respektem ol jif mo wok blong olgeta. Blong toktok ia hemi kamtru, ol jif oli nid blong luk Vanuatu olsem wan blong mekem se yumi evriwan i tingting olsem wan, toktok olsem wan, wok olsem wan, mo wokbaot olsem wan blong i gat pis, joe mo uniti long Vanuatu oltaem.

2 Vanuatu At Festivol long Santo

　　Long seken Vanuatu At Festivol we hemi tekem ples long Luganvil long aelan blong Santo, Viradoro hemi bin mekem narafala muv blong hem blong defendem raet mo nem blong ol jif long Vanuatu. Long festivol ia Vanuatu Gavman i bin invaetem Sir Julius Chan blong talem tangkiu long hem from help blong Papua Niu Gini soldia long taem blong rebelian we i bin stap long Vanuatu bifo independens long 1980 speseli long Nagriamel long aelan blong Santo. Long taem ia tu Viradoro hemi bin stap long Santo.
　　Olsem long ol narafala taem, Viradoro hemi no bin stap long program blong dei. Folem protokol, Viradoro hemi bin askem oganaesa blong dei ia Mr Joe Joseph sipos hemi save givim wan toktok be taem Mr Joseph hemi bin askem ol jif blong Pentikos be olgeta oli bin talem no. Nomata long hemia, taem we ol bigfala man blong gavman oli stap rere blong givim ol toktok blong tangkiu long Sir Julius Chan, Viradoro hemi bin kamtru wetem ful kastom dres blong hem. Taem we ol bigfala man blong gavman oli givim ol toktok blong olgeta finis, afta oli bin alawem Viradoro blong mekem wan toktok.
　　Bifo Viradoro hemi mekem toktok blong hem, hemi bin karem wan red mat blong Pentikos mo hemi openem blong givim long Sir Julius Chan olsem saen blong respek mo tangkiu long bihaf blong ol jif mo ol pipol blong Vanuatu from help blong olgeta long rebelian we i bin stap long 1980. Hemia nao ol toktok we Viradoro hemi bin talem long taem ia.
　　Fes taem Viradoro hemi bin talem bigfala tangkiu long gavman mo ol pipol blong PNG from oli bin agri karemaot wok folem rikwes blong Vanuatu Gavman nomata we taem i bin sot nomo. Hemi bin go on blong talem se PNG hemi olsem wan bigfala brata insaed long Melanisa wetem Pasifik long saed blong saes blong kaontri, namba blong ol pipol, save long saed blong skul, mo long saed blong ol najorol risos we hemi gat. Folem lukluk mo tingting ia bambae hemi moa gud sipos ol lida blong ol kaontri ia wetem ol pipol blong olgeta i save wok tugeta moa blong helpem wanwan long olgeta nomata long gud taem o nogud taem. Viradoro hemi bin talem se wanem we PNG Gavman tru long ol soldia blong hem oli bin mekem bambae hemi las wan be hemi stat blong gudfala fasin mo wok tugeta we i save gohed long ol yia we oli stap kam.
　　Afta we hemi bin finisim ol toktok blong hem, Viradoro hemi bin givim wan red mat ia long Sir Julius Chan. Red mat ia hemi olsem saen blong talem bigfala tangkiu long wanem we PNG Gavman hemi bin mekem long taem blong rebelian long 1980 mo tu, olsem saen blong stat blong niufala rilesensip mo wok tugeta bitwin long ol kaontri blong Pasifik speseli long eria blong Melanisa.

3 Ded blong wan memba blong Vanuatu Mobael Fos (VMF)

　　Wan long ol memba blong Vanuatu Mobael Fos (VMF) sam man oli bin kilim hem wan naet afta long danis long Seven Sta Naetklab long Luganvil long aelan blong Santo. Memba blong fos ia hemi blong Tanna. Long taem ia ol man Tanna oli bin kros tumas mo tingting mo toktok i bin stap go raon se bambae oli kilim jenis blong wantok blong olgeta. Tingting mo toktok ia hemi bin mekem se ol man not blong Vanuatu we oli liv mo wok long Pot Vila oli bin fraet tumas be speseli olgeta blong yumi long Santo from problem ia i bin hapen long nasara blong olgeta.
　　Hemi bin hapen se long taem ia tu Viradoro hemi bin stap long Pot Vila. Long dei we gavman tru long ol bigman blong fos oli bin oganaesem blong flaem bodi blong memba blong fos ia long Santo blong go long Tanna, oli bin disaed tu se bambae hemi stop ova smol taem long Vila blong ol narafala memba blong fos mo ol bigfala man blong gavman oli save givim las respek blong olgeta long hem bifo hemi go blong oli berem hem long aelan blong hem long Tanna.
　　Taem we plen we hemi karem bodi blong memba blong fos hemi kasem long Baofil eapot long Vila we ol bigman blong gavman wetem gad blong ona i stap, Viradoro hemi bin kamtru long eapot. Viradoro hemi karem wan red mat blong Pentikos we oli stap usum long kavremap ol man bifo oli berem olgeta mo hemi krae mo hemi wokbaot tu long gad blong ona we i bin stap. Viradoro hemi krae from hemi sore tumas long wan long ol pikinini blong hem we hemi ded.
　　Taem we hemi gotru long gad blong ona ia mo hemi go stret long bodi blong memba blong fos ia mo hemi openem red mat mo putum antap long top blong kes blong hem. Long taem ia evriwan oli bin stap kwaet mo Viradoro hemi bin talem toktok ia long olgeta. Hemi bin talem olsem se hemi sore tumas long pikinini blong hem ia we hemi bin wokbaot tru long nakamal blong ol jif we i stap long Tores i kam antap. Be taem hemi kasem long Santo be bos blong nakamal blong ol jif long Santo oli no strong inaf mo i bin mekem se wan long olgeta bos ia i bin foldaon mo kilim pikinini ia.
　　Viradoro hemi bin talem tu se long ol taem olsem, ol famle blong piginini o ol wantok blong hem bambae oli sore tumas mo bambae oli wantem blong kilim jenis blong hem. Bambae oli katem daon ol tri mo rere blong kilim jenis blong hem be sipos jif hemi kamtru wetem wan smol pig, bambae pis i mas stap. Tede, sipos i gat ol tingting o ol toktok oli stap ron finis blong i olsem be tede taem we jif hemi bin kamtru mo wetem smol red mat ia we i stap bambae hemi kam fandesen blong pis. Wetem ol toktok ia ol pipol blong Tanna oli bin harem save mo i mekem se i bin gat pis long taem ia.

4 Fes vot blong nogat tras long Vanuatu long 1991

　　Long 1991, Vanuatu hemi bin lukim fes vot blong nogat tras afta long independens long 1980. Long taem ia vot blong nogat tras i bin stap agensem Let Fr. Walter Lini olsem Praem Minista. Vot blong nogat tras ia hemi bin gotru mo hemi lukim niufala Praem Minista blong Vanuatu long taem ia we hemi Mr Donald Kalpokas.
　　Long taem ia Viradoro hemi bin stap long Pentikos mo taem vot blong nogat tras ia hemi bin gotru, hemi bin pem on pasis blong hem long plen mo kam long Vila. Taem hemi bin kasem long Vila, Viradoro hemi bin go blong luk Mr Donald Kalpokas olsem niufala Praem Minista. Be taem hemi go blong luk hem be Mr Kalpokas hemi sendem wan memba blong sekiuriti blong hem blong talem long Viradoro se hemi no save lukim hem from se hemi angkel blong Let Fr Walter Lini mo hem blong Pentikos.
　　Viradoro hemi nomo toktok wetem Mr Donald Kalpokas mo hemi disaed blong go lukim Let Fr Walter Lini we long taem ia oli bin stap tugeta long Blu Hol Risot. Be taem Viradoro hemi bin tekem taksi long Pot Vila taon blong go long Blu Hol Risot, i bin gat wan memba blong Vanuatu Mobael Fos (VMF) hemi bin lukim hem we hemi bin go blong lukim Praem Minista, Mr Donald Kalpokas mo hemi talem i kasem long olgeta long Blu Hol. Mo taem we Viradoro hemi kasem long Blu Hol Risot, oli no bin alawem blong hem blong go insaed mo toktok wetem Let Fr Lini.
　　Long taem ia, Viradoro hemi bin disaed blong kam bak long taon. Be fulap pipol we oli bin stap long taem ia oli bin sore long hem. Ham Lini mo ol narawan oli bin disaed blong mekem Viradoro hemi faen bifo hemi save stap wetem olgeta. Oli bin givim wan long ol red mat blong Pentikos mo askem Viradoro blong hemi toktok o talem rod blong hem, be hemi talem long olgeta se hemi no save rod blong hem. Hemia i bin mekem se Thomas Liu hemi bin toktok long Viradoro mo taem hemi givim olsem faen blong Viradoro. Long taem ia Dinh Van Than hemi bin kam mo karem faen ia. Long tingting blong Viradoro long taem ia, hemi bin ting se ating Let Fr Lini wetem ol narawan we oli bin stap long taem ia oli ting se Than nao bambae hemi niufala jif blong olgeta.
　　Viradoro hemi bin sore tumas from Mr Kalpokas mo Let Fr Lini tufala tugeta i save gud long hem long ol tingting, toktok, wok, mo wokbaot blong hem long taem bifo mo afta long independens. Nomata we Viradoro hemi bin ting se tufala man ia i save long hem, i no bin gat wan long tufala i bin wantem mitim hem long taem ia.
　　Viradoro hemi bin livim haos, nakamal, nasara, mo ol pipol blong hem long Pentikos wetem tufala toktok nomo. Fes wan, hemi bin go blong sekhan blong Mr Kalpokas olsem niufala praem minista mo blong talem long hem olsem papa blong tufala se hemi gud yu putumaot brata blong yu. Hemia ples blong yutufala. Ating yu bin lukim sam samting we brata blong yu i bin mekem we oli no stret taem we hemi bin stap olsem fes bon long yutufala. Be tede we yu stap long ples ia, yu mas mekem sua se ol rong samting we brata blong yu hemi bin mekem,yu bambae yu nomo mekem bakegen.
　　Narafala toktok we Viradoro hemi bin wantem talem. Hemi bin wantem sekhan long Let Fr Lini mo talem toktok ia long hem. Tede brata blong yu hemi putumaot yu long ples blong yutufala. Hemia i oraet nomo be yu no mas harem nogud mo yu no mas kros from hemi brata blong yu nomo. Ating yu bin mekem samting we oli no stret. Tede we i hapen olsem, yu go daon kwaet mo yu folem hem. Be mi talem long yu se sipos oli lidim kaontri ia gogo i kasem wan taem we oli nomo save mekem. Mo taem we oli singaotem yu bakegen blong yu tekem ova lidasip, bambae i nomo gat eni man i save tekemaot yu long ples ia. Taem ia nao yu nomo bambae yu jusum jenis blong yu we ae blong yu hemi bin luksave tru long ol tingting, toktok, wok, mo wokbaot blong hem. Be Mr Kalpokas mo Fr Lini tufala i no bin wantem lukim 　　Viradoro, so ol toktok ia oli no bin kamaot long taem ia.
Long taem we Viradoro hemi bin stap wetem olgeta long miting ia long Blu Hol Risot, hemi no bin talem eni toktok long olgeta. Taem ia nao Nasonal Unaeted Pati (NUP) hemi bin bon. Long taem ia we NUP hemi bon mo taem oli bin askem 　　Viradoro blong hemi rejista olsem wan memba, be hemi bin ansarem olgeta se hemi nomo save rejista from hemi no save rod blong hem mo i moa gud blong oli mekem olsem we oli save. Long taem ia nao, Viradoro hemi finis long politik mo hemi go bak blong stap kwaet long vilij.
　　Viradoro tru long laef blong hem long ol tingting, toktok mo wok blong hem i soem oltaem se hemi papa blong evri man, woman mo pikinini we hemi bon insaed long Vanuatu. Long japta ia yumi bin lukim Viradoro hemi soem tru long ol defren ivent we hemi bin stap long olgeta mo tru long ol toktok blong hem long ol taem ia.
　　Viradoro hemi talemaot fulap taem se Vanuatu hemi ples blong ol jif we hemi ripresentem olgeta. Hemi talemaot strong oltaem se gavman, jos mo skul oli blong jif. Hemi talem olsem from se hemi bin tru long jif we ol samting ia oli bin kamtru long Vanuatu long taem blong tufala gavman blong Inglis mo Franis. Hemi go on blong talem se blong gavman, jos mo skul blong oli mekem gud wok blong olgeta, jif mo wok blong ol jif i mas stap olsem stamba blong olgeta blong i gat pis, joe, sekiuriti, fogivnes, mo prosperiti long Vanuatu.

5 Viradoro insaed long pokamasin

　　Fulap long yumi long tufala taon blong Pot Vila mo long Luganvil oli stap tokbaot from wanem Viradoro hemi stap go insaed mo putum mane insaed long pokamasin. Fulap long yumi tu i stap sem blong lukim wan olfala mo wan jif olsem Viradoro insaed long ol pokamasin ia. Ol tingting, lukluk mo toktok ia oli stret nomo. Be hemi gud tu blong yumi evriwan i save long ol risen from wanem man olsem Viradoro hemi go insaed long ol ples olsem. Long ples ia bambae yumi lukluk long sam long ol risen ia.
　　Viradoro hemi gat tufala bigfala risen blong soem long yumi evriwan from wanem hemi stap go insaed long ol pokamasin. Wan, olsem we yu save finis se long evri tingting, lukluk, toktok, mo wokbaot blong hem, hemi mekem i klia se Vanuatu hemi ples blong hem mo evriwan we oli stap long Vanuatu oli ol pikinini blong hem. So evri samting we gavman, jos o skul i mekem insaed long Vanuatu hemi blong hem mo oli mas askem long hem bifo oli mekem. Taem Viradoro hemi tokbaot hem long ples ia, hemi no minim hem wan be hemi minim ol jif we hemi ripresentem olgeta insaed long ol tingting, toktok mo wokbaot blong hem. Hemi talem se taem gavman hemi bin wantem ol pokamasin blong kam insaed long Vanuatu, hemi no bin askem long ol if. From risen ia nao, hemi olsem lida blong ol pipol hemi mas go insaed blong jekem se hemi wan gudfala samting o nogat mo hemi nao bambae hemi talemaot long ol pipol se pokamasin hemi gud o nogud.
　　Namba tu risen. Viradoro hemi go insaed long ol pokamasin blong soem long yumi evriwan se hemi wan milionea. Hemi talem se hemi wan milionea from se hemi talemaot finis se evri samting we yumi mekem long Vanuatu, hemi blong hem. Hemi wantem soem mo talem long yumi evriwan long Vanuatu se ol ples blong ol pokamasin hemi ples blong ol milionea nomo. Viradoro hemi talem se hemi gat evri raet blong talemaot se hemi wan milionea tu from se hemi bin mekem evri samting we hemi sipos blong mekem tru long tingting, lukluk, toktok, mo wok, mo naoia hemi taem we hemi save pleplei olsem we hemi wantem. Taem we ol milionea oli gat tumas mane, oli go insead long ol pokamasin blong pleplei wetem mane blong olgeta. Fulap taem oli no plei blong win be oli plei blong rilaks tingting blong olgeta afta long wan had dei long wok.
　　Wetem expiriens blong Viradoro insaed long ol pokamasin, hemi bin talemaot strong long fulap long yumi se pokamasin hemi nogud. Hemi talem se ol man Vanuatu we yumi wok from smolsmol mane nomo, yumi no mas go insaed long ol pokamasin from mane we yumi karem hemi smol tumas. Wetem smol mane we yumi stap kasem, yumi mas sevem gud blong sendem ol pikinini blong go long skul mo ol narafala samting we hemi save helpem laef blong ol taem we i stap kam bihaen. Tede long Vanuatu yumi save lukim fulap nogud samting we pokamasin tu i stap kosem, olsem brekap long wanwan famle, stil mo ol narafala nogud fasin we yumi stap luk i stap hapen tede long tufala taon blong yumi, Pot Vila mo Luganvil.

6 Viradoro i satap askem mane long taon blong Pot Vila mo Luganvil

　　Fulap long yumi we i save long Viradoro long tufala taon blong yumi long Pot Vila mo Luganvil i stap tokbaot o harem ol narafala man oli stap talem se hemi wan olfala we hemi stap askem mane olbaot o ron long ol taksi mo bus fri nomo. Fulap long yumi oli taet long hem. Hemia i mekem se fulap taem ol man we oli save long hem oli haed taem oli lukim mo ol taksi mo bus draeva oli nomo stap karem hem sipos hemi stopem olgeta. Hemi gud blong yumi tokbaot hem from ol fasin ia, be hemi gud tu blong yumi save from wanem hemi mekem ol fasin ia. Hemia sam long ol risen blong kliarem long yumi from wanem hemi stap mekem ol fasin ia.
　　Wan, Viradoro hemi talemaot fulap taem finis se hemi wan bigfala jif we hemi bin wok from mo Vanuatu hemi ples blong hem. Hemi talem se evriwan we i stat long Tores i go kasem long Aneityum oli ol pikinini blong hem mo evri samting we yumi mekem long Vanuatu hemi blong hem o yumi mekem long nem blong hem. Hemi wantem pruvum se yumi ol man Vanuatu i save kam wan o nogat we i min evri olfala we i stap long Vanuatu hemi ol papa blong yumi. Hemia i semak tu long ol mama, brata, sista mo ol narafala laen we yumi stap singaotem o folem long Vanuatu. Viradoro hemi bilif se long wei mo fasin ia nomo bambae i save gat pis, joe, uniti, mo respek long Vanuatu.
　　Namba tu risen. Viradoro hemi ting se hemi bin mekem evri samting finis tru long tingting, toktok, wok, mo wokbaot bifo mo afta long independens mo hemi taem blong hem blong enjoem hem mo talem ol las toktok long ol yangfala we yumi wok tede blong save helpem yumi long ol wok mo wokbaot blong yumi. Hemi ting se ol jif we hemi stanap long hed blong olgeta we i stat long Tores i go kasem long Aneityum oli stamba o fandesen blong Vanuatu. Hemi talem olsem se hemi olsem wanfala tri we sipos stamba blong tri ia hemi laef bambae hemi mekem se tri ia i save karem frut blong ol narafala plan mo anamol i save kaekae long hem. Mo tu, hemi olsem wan haos we fandesen blong hem i mas stap strong oltaem sipos no bambae haos ia hemi foldaon. So blong Vanuatu hemi stap gud oltaem stamba o fandesen blong hem i mas stap gud oltaem.
　　Namba tri risen. Viradoro hemi talem se aksen we hemi stap tekem naoia o fasin we hemi stap mekem naoia hemi mekem blong yumi tokbaot. Hemi talem se hemi gud we yumi stap tokbaot se from wanem nao wan olfala o wan jif olsem Viradoro hemi stap askem mane long ol man o ron fri long ol taksi o bus. Viradoro hemi talem se hem olsem wan jif we hemi bin wok had from Vanuatu mo ol pipol blong hem bifo mo afta long independens, hemi wantem save from wanem nao Vanuatu i nomo folem ol tingting we i bin stap bifo i kam. Hemi talem tu se wetem ol mane mo fri taksi o bus we yumi stap tokbaot tede hemi gud be yumi mas save se hemi stap askem. Sipos yumi wantem givim hemi oraet be sipos nogat hemi oraet be olsem wanem long ol mane o ol narafala samting blong ol pipol blong Vanuatu we ol lida wetem yumi we i stap wok long gavman, jos mo skul yumi stap usum o holem we yumi no askem. Hemi mekem tu blong helpem yumi blong tokbaot mo faenem se wea nao yumi go rong mo putum bak Vanuatu long raet rod blong hem. Hemi talem tu se i no gud yumi spolem Vanuatu mo mekem se ol pikinini blong yumi o ol pikinini blong olgeta oli stap askem mane long ol man olsem we hemi stap askem tede.
　　Wetem ol toktok mo tingting we Viradoro hemi serem wetem yumi tru long buk ia long ol defren risen from ol defren aksen we hemi stap mekem blong save helpem yumi blong andastanem man ia Viradoro. Yumi hop tu se tru long ol tingting mo risen we hemi givim oli save helpem yumi long ol tingting, lukluk, toktok mo wokbaot blong yumi long ol taem we i stap kam bihaen.

LAS TOKTOK

　　Buk ia hemi bin traem blong soem long yumi hu ia nao hemi Jif Viradoro tru long laef stori blong hem mo sam long ol prinsipol blong laef we hemi bin wok folem tru long ol tingting, toktok mo wok we hemi bin mekem. Bambae fulap long yumi i no save agri wetem evri samting we hemi stap insaed long buk ia. Sipos yu wan long ol pipol ia, hemi stret nomo from buk ia hemi no wantem talem se wanem we Viradoro hemi bin talem o mekem hemi stret. Be wanem we buk ia hemi bin wantem mekem, hemi blong givim long yumi sam long ol bigfala tingting, lukluk mo toktok we Viradoro hemi bin mekem long laef taem blong hem kam kasem long tede.
　　Viradoro hemi talem mo hemi stanap strong yet se jif hemi stap bifo finis i kam. Jif hemi bin stap bifo jos, gavman mo skul oli jes kam mo hemi tru long jif we trifala samting oli bin save kam insaed long Vanuatu. From tingting mo bilif ia hemi mekem se hemi wok plante aotsaed long sistem blong gavman afta long independens. Viradoro hemi wok aotsaed long sistem blong gavman blong mekem sua se jif we hemi bin stap bifo jos, gavman mo skul oli kam hemi mas stap oltaem long Vanuatu. Mo jif we hemia, hemi wan we ae blong man hemi bin lukim save mo jusum blong hem kam jenis blong man be i no from ileksen, pig-kiling seremoni, politikol paoa o save long skul.
　　Tru long laef stori blong Viradoro mo sam long ol prinsipol blong hem, hemi klia se blong kam wan lida o jif hemi wan longfala rod. Hemi klia tu se blong jusum wan lida o jif, ae blong man i mas mekem be i no long fasin blong ileksen. Viradoro hemi bilif strong se evriwan we hemi bon long Vanuatu oli jenis blong ol man mo woman, mo man o woman ia nomo i save jusum jenis blong hem taem we taem blong hem hemi stret.
　　Viradoro tru long laef, tingting, toktok, mo wok blong hem, hemi stanap strong oltaem blong defendem raet blong ol jif. Hemia hemi bin soem tru long laef mo wok blong hem bifo long independens mo afta long independens. Hemi bilif strong se jif nao hemi fandesen blong Vanuatu mo Vanuatu hemi ples blong jif. Hemi bilif strong tu se sipos jif hemi tekem ples blong hem long Vanuatu bambae i gat respek, pis, oe, mo uniti long Vanuatu oltaem.
　　Truaot long laef mo wok blong hem, hemi klia se Viradoro hemi bin givimap laef blong hem from ol pipol blong Vanuatu long evri tingting, toktok mo wok we hemi bin mekem. Long Viradoro long yia 2000, hemi ting se hemi bin mekem evri samting olsem tingting, toktok mo wok we hemi bin sipos blong mekem olsem jif mo lida, mo naoia hemi livim evri samting ia long prea. Sipos evri samting we hemi bin tingbaot, tokbaot mo wokem oli stret long ae blong God, bambae God nomo hemi jes talemaot long taem blong hem. Hemi klia tu se sipos man olsem Viradoro we hemi bin givimap laef blong hem from ol pipol blong Vanuatu hemi harem nogud from Vanuatu hemi nomo save ron folem tingting mo lukluk blong hem, yumi evriwan olsem ol lida blong kaontri ia yumi nid blong tingting mo lukluk gud long hem.
　　Yu bin gotru long buk ia mo lukluk long sam long ol bigfala tingting, bilif, toktok, wok, mo ol aksen blong Viradoro long ol defren taem long laef blong hem. Yumi hop se wetem buk ia yumi evriwan long Vanuatu, bambae yumi kam blong luksave hu ia nao hemi Viradoro. Buk ia hemi blong givim tru pikja blong man ia Viradoro mo long sem taem hemi traem blong givimaot sam tingting, toktok mo wok we Viradoro hemi bin mekem we i save helpem yumi wanwan long ol defren laef blong yumi.

NOT

(1)Russel Nari hemi bon long Vanuatu long 1967. Hemi man Pentikos blong Vanuatu. Hemi tekem digri blong B.A. long University of Papua New Guinea. Nao hemi stap insaed long Vanuatu Environment Unit olsem Prinsipal - Policies and programs. Mo hemi stap stadi naoia long National Centre for Development Studies long Australian National University blong tekem digri blong M.A. long saed blong Envaeromen mo Developmen. Masanori Yoshioka hemi bon long Japan long 195l. Hemi man Janan. Hemi tekem digri blong Ph.D. long Tokyo Metropolitan University long saed blong Sosial Antoropoloji. Naoia hemi Profesa long Kobe University long Japan.
(2)Buk ia, Russel Nari hemi raetem eli draft blong hem, afta Masanori Yoshioka hemi jekem olgeta samting insaed longbuk ia.
(3)Praes blong woman, o volin vavine long lanwis blong Not Pentikos, hemi bin faef pig long taem bifo, be nao ia ating hemi go antap from we plante man ol i stap long ten pig long evri mared. Be long Viradoro, namba blong pig hemi no impoten. Long tingting blong hem, impoten samting hemi we evriman i holem raet blong mared. So hemi ting se namba blong pig hemi dipen long hao mas pig we man ia hemi gat